67 gazetarë e punonjës të medias të vrarë brenda këtij viti
Sipas një raporti të ri, të publikuar të premten, lufta e Rusisë në Ukrainë, kaosi në Haiti dhe dhuna në rritje nga grupet kriminale në Meksikë kanë kontribuar në një rritje të mprehtë të numrit të gazetarëve të vrarë në detyrë gjatë vitit 2022.
Federata Ndërkombëtare e Gazetarëve thotë se 67 gazetarë dhe staf mediatik janë vrarë në mbarë botën deri më tani këtë vit, nga 47 sa ishin vrarë vitin e kaluar.
Grupi me bazë në Bruksel ka numëruar gjithashtu 375 gazetarë të burgosur aktualisht për punën e tyre, me shifrat më të larta në Kinë duke përfshirë Hong Kongun, në Myanmar dhe në Turqi. Ndërsa, raporti i vitit të kaluar tregon për 365 gazetarë të burgosur.
Me numrin e punonjësve të medias të vrarë në rritje, federata dhe grupe të tjera për të drejtat e medias u kanë bërë thirrje qeverive të ndërmarrin veprime më konkrete për të mbrojtur gazetarët dhe gazetarinë e lirë.
“Dështimi për të vepruar vetëm do të inkurajojë ata që kërkojnë të shtypin rrjedhën e lirë të informacionit dhe minojnë aftësinë e njerëzve për t'i mbajtur udhëheqësit e tyre përgjegjës, duke përfshirë sigurimin që ata me pushtet dhe ndikim të mos qëndrojnë në rrugën e hapur dhe gjithëpërfshirëse për shoqëritë”, ka thënë Sekretari i Përgjithshëm i Federatës Ndërkombëtarë të Gazetarisë, Anthony Bellanger.
Sipas federatës, numri më i madh i gazetarëve të vrarë është në Ukrainë, gjithsej 12. Po ashtu, u tha se viti 2022 ka qenë një nga më vdekjeprurësit ndonjëherë për gazetarët në Meksikë, vend që tani konsiderohet si më i rrezikshmi për gazetarët jashtë një zone lufte.
Grupi ka regjistruar edhe pesë vdekje të gazetarëve në mes të krizës politike të këtij viti në Pakistan dhe ka paralajmëruar për kërcënime të reja ndaj gazetarëve në Kolumbi dhe rrezik të vazhdueshëm për gazetarët në Filipine.
Federata Ndërkombëtare e Gazetarëve me qendër në Bruksel përfaqëson 600,000 profesionistë të medias nga sindikatat dhe shoqatat në më shumë se 140 vende. Raporti i saj u publikua në prag të Ditës së të Drejtave të Njeriut të Kombeve të Bashkuara.
