Profesorë e shoqëri civile letër Speciales: Përdorimi i provave nga MUP-i, zbeh besueshmërinë ndaj Gjykatës

Profesorë të njohur në Universitetin e Prishtinës e Universitete ndërkombëtare nëpër botë, bashkë me përfaqësues të shoqërisë civile, i janë drejtuar me letër Dhomave të Specializuara të Hagës.

Në letër, ata alarmojnë për pranimin e provave nga Ministria e Brendshme e Serbisë e institucione të tjera të Beogradit.

Nacionale raportoi ditë më parë për këtë zhvillim të Gjykatës Speciale.

Në letër, thuhet se pranimi i këtyre provave e zbeh besueshmërinë e qytetarëve ndaj Gjykatës Speciale.

“Si profesionistë dhe zëra të shqetësuar, e konsiderojmë thellësisht problematike që dokumente të prodhuara nga institucione shtetërore serbe të viteve ’90, përfshirë shërbimet e sigurisë, të mund të trajtohen sot si prova legjitime në këtë gjykatë. Ky zhvillim ka kontribuar në përshkallëzimin e krizës së besimit publik në këtë institucion, i cili po shihet gjithnjë e më shumë me skepticizëm nga qytetarët që supozohet t’i shërbejë. Prandaj, legjitimiteti i këtij procesi nuk duhet të bazohet vetëm në përmbushjen formale të rregullave, por në nevojën për të përmbushur standarde të paanshmërie nga qytetarët e Kosovës”, thuhet në letër, raporton Nacionale.

Sipas letrës, Tribunali i Hagës kishte vendosur se këto institucione prej të cilave kanë pranuar prova, kanë qenë të përfshira në kryerjen e krimeve të luftës.

“Tribunali Penal Ndërkombëtar për ish-Jugosllavinë (ICTY) ka dokumentuar me prova të shumta se organe të shtetit serb, si Ministria e Brendshme dhe mekanizmat e tjerë të sigurisë, kanë qenë të përfshira në krime sistematike kundër civilëve shqiptarë të Kosovës. Pranimi i dokumenteve të prodhuara nga institucione që janë implikuar drejtpërdrejt në spastrim etnik, krime lufte, fushata dezinformimi dhe mohimin e të drejtës së Kosovës për të ekzistuar si shtet, rrezikon seriozisht besimin publik në integritetin e procesit gjyqësor në Dhomat e Specializuara”, thuhet në letër.

“U bëjmë thirrje të gjitha partive relevante që të angazhohen në një proces të përbashkët për të shqyrtuar dhe përmirësuar ligjet dhe procedurat ekzistuese, në mënyrë që ato të jenë të afta të krijojnë një proces gjyqësor të drejtë dhe të paanshëm, duke mbrojtur interesat legjitime të të gjitha palëve dhe duke forcuar besimin e publikut në këtë institucion. Për këtë qëllim, ne ftojmë Dhomat e Specializuara, Qeverinë e Kosovës, Kuvendin e Kosovës dhe shoqërinë civile të bashkëpunojnë në identifikimin dhe zbatimin e reformave të nevojshme, duke siguruar që të respektojë të drejtat e të akuzuarve dhe viktimave në të njëjtën masë, dhe ta bëjë këtë në transparencë, gjithëpërfshirje dhe koordinuar”, thuhet më tutje.

Letra është nënshkruar nga:

Dr. Ramadan Ilazi, Drejtor i Humbult në Qendrën Kosovare për Studime të Sigurisë (QKSS)
Dr. Arben Hajrullahu, Profesor, Departamenti i Shkencave Politike, Universiteti i Prishtinës
Dr. Linda Gusia, Profesore Asistente, Departamenti i Sociologjisë, Universiteti i Prishtinës
Mr. Agon Maliqi, Analist, Policy Thinker/Median, Dr. Linda Gusia, Profesore Asistente, Departamenti i Sociologjisë, Universiteti i Prishtinës
Dr. Bekim Baliqi, Profesor i Asociuar, Departamenti i Shkencave Politike, Universiteti i Prishtinës
Dr. Lulzim Peci, Drejtor Ekzekutiv, KIPRED
Dr. Blendi Kajsiu, Profesor, Universiteti i Evropës Juglindore (UEJL)
Mr. Bekim Blakaj, Drejtor Ekzekutiv, Fondi për të Drejtën Humanitare Kosovë (FDHK)
Mr. Kushtrim Shaipi, Drejtor Ekzekutiv, Demokraci Plus (D+)
Mr. Fisnik Rexhepi, Humbultues në Shoqatën për Politikë të Jashtme, Universiteti i Prishtinës
Dr. Gëzim Visoka, Profesor, Universiteti Dublin City