Zyrtare: Eder Militao rinovon deri më 2028

Real Madrid ka konfirmuar se qendërmbrojtësi Eder Militao ka rinovuar kontratën deri më 2028.

Ylli brazilian ka gjetur gjuhën e ‘përbashkët’ me gjigantin madrilen që të vazhdojë edhe për katër vitet e ardhshme.

“Real Madrid dhe Eder Militao kanë arritur marrëveshje për të vazhduar kontratën e lojtarit tonë, që mbetet i lidhur me klubin deri më 30 qershor 2028”, shkruhet në komunikatë.

Militao e ka dëshmuar vetën si një nga qendërmbrojtësit më të mirë në botë këto vitet e fundit, duke dëshmuar se ka rol të rëndësishëm te skuadra madrilene.

Braziliani në pesë vite te Reali ka fituar nëntë tituj, pra Ligën e Kampionëve, Kupën e Botës për klube, Superkupën e UEFA-s, Kupën e Mbretit, dy La Liga si dhe tre herë Superkupën e Spanjës.

Lojtari momentalisht po shërohet nga lëndimi që pësoi në fillimin e sezonit, duke këputur ligamentin kryesor të gjurit dhe pritet të rikthehet vetëm në fundin e sezonit.

Në 143 ndeshje, Militao ka kontribuar me 11 gola.