Zyrtare: Al Hilali e blen Ruben Nevesin për 55 milionë euro nga Wolves

Wolves e ka shitur kapitenin e vet Ruben Neves te klubi i Arabisë Saudite, Al Hilal, për një shumë rekorde të klubit 55 milionë euro.

Mesfushori 26-vjeçar nga Portugalia e kishte edhe një vit kontratë me klubin e Premierligës, por vendosi të largohet pas plot gjashtë sezoneve në Molineux.

Futboll / Klubi saudit po bën gjithçka për ta blerë Silvën nga Manchester City

Neves është emri më i fundit i madh i futbollit evropian që e braktis kontinentin për të luajtur në Saudi Pro League.

Përfaqësuesi i Portugalisë e kishte refuzuar Barcelonën për të shkuar në Al Hilal.

Në fillim të këtij muaji, Karim Benzema e la Real Madridin për t’iu bashkuar A Ittihadit, duke e ndjekur rrugën e ish-bashkëlojtarit Cristiano Ronaldo, që i ishte bashkuar Al Nassrit në janar.

Mesfushori N’Golo Kante u largua nga Chelsea dhe iu bashkua Al Ittihadit të Benzemas gjatë kësaj jave.

Portieri i Chelseat Edouard Mendy është shumë afër të nënshkruajë për klubin tjetër të Saudi Pro League, Al Ahli, derisa Bernardo Silva i Manchester City është caku i radhës i Al Hilalit.

Shuma që e pagoi Al Hilali për mesfushorin portugez e tejkalon shumën që Liverpooli e pagoi për ta blerë Diogo Jotan nga Wolves në vitin 2020.

Kjo shifër është po ashtu më e larta që një klub i Saudi Pro League e ka paguar për ta blerë një futbollist, duke e thyer rekordin që Al Hilali e kishte vendosur kur e kishte blerë Matheus Pereira nga West Bromi prej 18 milionë eurove më 2021.

Neves, i cili i ndihmoi Wolvesit të promovohet në Premierligë në sezonin 2027/18 dhe pastaj ta forcojë qëndrimin në elitë, e përshkroi kohën e kaluar në Molineux si një rrugëtim të jashtëzakonshëm në një letër të hapur drejtuar tifozëve të klubit.