Zidane nuk e përjashton mundësinë që të ardhmen të punojë në Itali

Zinedine Zidane ishte prezent për ta shikuar premierën e dokumentarit për ish-trajnerin e Italisë dhe Juventusit, Marcello Lippi, nga ku ka komentuar të ardhmen e tij, duke thënë se do të dëshironte të drejtonte një skuadër në Itali.

Fituesi i Topit të Artë dhe legjenda e Francës së pari la shenjën e tij në Juventus nën drejtimin e Lippit, duke luajtur për Zonjën e Vjetër nga viti 1996 deri në transferimin e tij rekord te Real Madrid në 2001.

“Si trajner, kam mësuar shumë nga Lippi dhe Carlo Ancelotti”, tha Zidane për Sky Sport Italia dhe DAZN.

“Lippi ishte trajneri i parë që besoi vërtet tek unë. Ai më solli në Juve dhe u bëra lojtari që isha falë tij”.

Ndeshja e fundit e karrierës së tij u kryqëzua gjithashtu me Lippin, i cili ishte trajner i skuadrës së Italisë që fitoi finalen e Kupës së Botës 2006 me penallti.

Zidane u përjashtua me karton të kuq në kohën shtesë për goditjen me kokë në gjoks ndaj Marco Materazzi dhe kishte njoftuar tashmë tërheqjen e tij para atij incidenti tronditës.

Ndërkohë, Zidane është lidhur me një rikthim të mundshëm në Serie A dhe Juventus si trajner që do të zëvendësojë Max Allegrin sezonin e ardhshëm.

Ai u pyet nëse do të donte të kishte përvojë në menaxhim edhe në Itali.

“Pse jo, gjithçka mund të ndodhë. Do të doja të jem trajner në Itali një ditë”.

51-vjeçari ishte një ndihmës trajner i Ancelottit, më pas mori detyrën kryesore në dy periudha të ndryshme nga janari 2016 deri në maj 2018, dhe përsëri nga marsi 2019 deri në qershor 2021.

“Unë nuk jam trajner për momentin, por pse jo? Më pëlqen Italia dhe më pëlqen që ata e duan futbollin në Itali”.