Xhaka: Pikë e merituar ndaj Bayernit, mbrojtja ta fiton titullin
Granit Xhaka e ka vlerësuar si të mençur paraqitjen e Bayer Leverkusenit ndaj Bayern Munichut, megjithatë është i lumtur me pikën e marrë.
Ylli shqiptar që përfaqëson Zvicrën asistoi te goli i Leverkusenit, sfidë që përfundoi me rezultat 1:1, mirëpo Bayern ishte dukshëm në nivel tjetër.
“Luajtëm mençur dhe sigurt. Pika nuk është e pamerituar. Bayerni kishte më shumë posedim, por kjo nuk ta fiton ndeshjen”.
“Siç thonë, mbrojtja e fiton titullin. Bëmë ashtu siç kërkoi trajneri. Jemi të lumtur me rezultatin 1:1”.
“Humbët shumë kohë? Kishte të bënte vetëm me ritmin e lojës. Kjo është pjesë e futbollit. Kemi stërvitur gjatë tërë javës. Në një top ndeshje, detajet e vogla mund të vendosin gjërat”, nënvizoi Xhaka.
Ndër të tjera, ai kishte lëvdata edhe për serbin Alexandar Pavlovic, i cili ka zgjedhur ta përfaqësojë Gjermaninë.
“Është djalë me shumë potencial, përndryshe nuk do të ishte te Bayernit. A është më i mirë se ti në këtë moshë? Për mua është një lojtar komplet ndryshe”.
“Bayerni është gjithmonë garues për titull, përfshirë edhe këtë sezon. Sidoqoftë ata do të vijnë në Leverkusen e aty do të jetë një ndeshje krejtësisht tjetër”.
Bayern Munich aktualisht është lider me 13 pikë të mbledhura pas pesë xhirove, tre më shumë se Leverkuseni.
