Wimbledoni ua ndalon pjesëmarrjen tenistëve rusë dhe bjellorusë
Tenistët rusë dhe bjellorusë nuk do të lejohen të luajnë në Wimbledon këtë vit, për shkak të pushtimit të Ukrainës.
Numri dy i botës në tenisin e burrave, Daniil Medvedev nga Rusia dhe numri katër i botës në tenisin e grave, Aryna Sabalenka nga Bjellorusia, janë dy tenistët e renditur më së larti që janë prekur nga ky vendim.
Lojtarët nga këto dy vende janë lejuar të garojnë në garat e tenisit por jo nën flamujt e tyre kombëtarë.
Wimbledoni, i cili njihet si turneu më prestigjioz grand slam në botë, do të zhvillohet nga 27 qershori deri më 10 korrik.
Mediat britanike raportojnë se All England Lawn Tennis Club, organizatori i turneut, do ta bëjë zyrtar njoftimin sot më vonë.
Sabalenka e arriti gjysmëfinalen e Wimbledonit vitin e kaluar, derisa Medvedevi rrethin e katërt.
Numri 15 i botës rusja Anastasia Pavlyuchenkova – e cila në fillim të këtij viti bëri thirrje që lufta në Ukrainë të ndalet – dhe numri 18 i botës Victoria Azarenka e Bjellorusisë, nuk do të lejohen të marrin pjesë po ashtu.
Rusi tjetër Andrey Rublev është i teti në botë në renditjen e tenisit të burrave, ndërsa bashkatdhetari i tij Karen Khachanov i 26-ti.
Të gjithë tenistët rusë dhe bjellorusë do të jenë në gjendje të garojnë në grand slamin e tretë të këtij viti, French Open, i cili nis në maj.
AELTC-ja u konsultua me qeverinë britanike në prill se a t’i lejojë apo jo lojtarët rusë dhe bjellorusë për të garuar në turneun e sivjetmë të Wimbledonit.
Ministri i Sportit i Britanisë, Nigel Huddleston, kishte thënë kohë më parë: “Asnjeri që e valëvit flamurin rus nuk duhet të lejohet të luajë në Wimbledon”.
Ish-numri 13 në botë nga Ukraina, Alexandr Dolgopolov, e falënderoi Wimbledonin për, siç tha, ngritjen në skenë për t'i dhënë botës shembull.
“Unë besoj se Rusia duhet të izolohet në çdo mënyrë të mundshme dhe njerëzit e Rusisë duhet ta zgjidhin këtë problem”, tha Dolgopolov.
Shoqata e Tenisit të Grave (WTA) dhe Shoqata e Tenisit të Burrave (ATP) e kanë pezulluar turneun e tyre të kombinuar, i parapara të mbahej në Moskë në tetor.