Tonali: Gjykim qesharak dhe i turpshëm i ndeshjes Milan – Chelsea
Mesfushori i Milanit, Sandro Tonali, në mënyrë ironike tha se futbolli mund të bëhet basketboll duke u tallur me vendimet e gjyqtarit, Daniel Siebert, që i quan qesharake dhe të turpshme, të cilat sipas tij shkatërruan ndeshjen e kuqezinjve në Ligën e Kampionëve kundër Chelseas.
Gjyqtari i takimit mori komplet vëmendjen e ndeshjes, sidomos në pjesën e parë në San Siro, duke dhënë jo vetëm një penallti dhe karton të kuq për prekjen e lehtë të Fikayo Tomorit në shpatullën e Mason Mount vetëm pas 18 minutash, por gjithashtu dha pesë kartonë të verdhë dhe të gjitha për një total prej 17 faullesh.
Me gjashtë kartonë të dhuruar, ishte rekord në sezonin e sivjetshëm në Ligën e Kampionëve për më së shumti ndëshkime përgjatë 45 minutave të parë.
“Ka kaq shumë incidente të tilla gjatë një loje. Kur jep penallti dhe karton të kuq në minutën e 18, për një prekje të tillë…”, tha Tonali për Sky Sport Italia teksa shikonte ripërsëritjen e ndërhyrjes së Tomorit në Mason Mount.
“Ne gjithashtu mund ta bëjmë atë një ndeshje basketbolli ku çdo prekje është faull. Gjithsesi ishte kështu, ne kishim disa kartonë të verdhë për goditjet e lira qesharake dhe të turpshme vetëm në pjesën e parë.
“Gjithsesi, ne duhet të shikojmë pjesën tjetër të lojës. Ne u përpoqëm të luanim me krenari dhe pasion, edhe pse ishte shumë e vështirë në ato rrethana.
“Është zhgënjyese për të gjithë tifozët që erdhën këtu sonte, mbushën stadiumin dhe prisnin një ndeshje ndryshe. I falënderojmë që erdhën.”
Gjithçka nuk është e humbur, pasi Chelsea është në krye të grupit me shtatë pikë, i ndjekur nga RB Salzburg me gjashtë pikë, Milan dhe Dinamo Zagreb me katër pikë dhe skuadra e Stefano Piolit ka gjasat e saja për kualifikimin në fazën e eliminimit direkt.
“Ka dy ndeshje për të shkuar, gjithçka mbetet për të luajtur. Duhet të fitojmë, kjo është gjithçka që mund të bëjmë, pa parë penallti dhe kartonë të kuq. Është ende në duart tona.
“Ne duhet të jemi të fortë dhe të aftë ta kthejmë këtë zemërim në futboll. Zhgënjimi për të mos luajtur si Milani në ndeshjen e parë, zemërimi për vendimet sonte, duhet t'i kthejmë të gjitha në energji pozitive për dy ndeshjet e ardhshme.”
Milani udhëton në Verona të dielën për ndeshjen e ardhshme në Serie A, teksa ndeshja e ardhshme në Ligën e Kampionëve për kampionët e Italisë është pas dy javëve, ndaj Dinamo Zagrebit me të cilët ka pikë të barabarta dhe është e domosdoshme fitorja.
