Tifozë të arrestuar e 105 mijë euro dënim për Kroacinë për incidentet në përballjen ndaj Italisë

Federata kroate e futbollit është dënuar me 105 mijë euro dënim nga Komisioni i Etikës dhe Disiplinës brenda UEFA-s, për shkak të incidenteve në përballjen ndaj Italisë, ndërsa janë arrestuar mbi shtatë tifozë siç i tha policia mediumit Reuters.

Atmosfera rreth ndeshjes në Leipzig të hënën ishte në kontrast të plotë me dy ndeshjet e mëparshme të Euros në qytet, dhe në stadium tifozët kroatë ndezën disa fishekzjarrë dhe gota plastike u hodhën në fushë në shumë raste.

“Federata Kroate e Futbollit u gjobit me 105,000 euro për hedhjen e objekteve (45,000 euro), ndezjen e flakadanëve (30,000 euro) dhe sjelljen e papërshtatshme (30,000 euro) nga disa tifozë kroatë gjatë ndeshjes Kroaci-Itali”, thuhet në një deklaratë.

UEFA ende nuk i ka shpallur zyrtarisht sanksionet.

Kroacia ishte gjobitur më herët për ndezjen dhe hedhjen e fishekzjarreve nga tifozët gjatë lojës së tyre me Shqipërinë, dhe ka një hetim të veçantë të UEFA-s në vazhdim për sjelljen e supozuar raciste ose diskriminuese nga të dy grupet e tifozëve në atë ndeshje.

Policia e Leipzigut ishte në aksion para, gjatë dhe pas ndeshjes Kroaci-Itali, me arrestime të kryera dhe ngatërrestarë të njohur mes tifozëve kroatë u vunë në paraburgim deri pas ndeshjes.

"Të hënën në mëngjes u bë e ditur se tetë të ashtuquajtur tifozë me rrezik të lartë, të cilëve u ishte refuzuar hyrja në Gjermani nga Policia Federale një ditë më parë, u raportua se ishin në zonë," tha një zëdhënës i policisë së Leipzig për Reuters.

“Forcat policore kanë mundur të arrestojnë menjëherë pesë persona. Gjatë ditës, të pestët u sollën para gjykatësit dhe u konfirmua masa parandaluese deri të martën në mëngjes”.

Tre të tjerët u morën gjithashtu më vonë në paraburgim dhe tetë u liruan të martën në mëngjes dhe u dërguan në kufi.

Policia tha se rreth 10,000 kroatë u përfshinë në marshimin e tifozëve dhe disa mbështetës me rrezik të lartë iu nënshtruan kontrolleve parandaluese të policisë. Në stadium është dashur të ndërhyjë policia për shkak të përdorimit të shumtë të produkteve piroteknike.

Pas ndeshjes, rreth 20 tifozë kroatë sulmuan fizikisht tifozët italianë, dy prej të cilëve kërkuan shtrimin në spital. Policia ka arrestuar 11 të dyshuar kroatë dhe boshnjakë dhe ata janë duke u hetuar për shkak të lëndimit të rëndë trupor.