Ten Hag për lojtarët modernë: Kritika i demotivon, e shohin si fyerje
Ish-trajneri i Manchester United, Erik ten Hag, ka thënë se brezi i sotëm i futbollistëve profesionistë e konsideron kritikën si ofenduese dhe demotivuese, ndryshe nga lojtarët e epokës së tij.
Ten Hag pati disa përplasje të profilit të lartë me lojtarët gjatë kohës së tij në Old Trafford, përfshirë Cristiano Ronaldon, Jadon Sanchon dhe Marcus Rashfordin.
"Ky brez zakonisht e ka të vështirë të merret me kritikat," tha Ten Hag për SEG Stories, krahu mediatik i agjencisë së tij të menaxhimit.
"Kritika me të vërtetë i prek ata. Brezi ku unë u rrita kishte lëkurë shumë më të trashë. Mund të ishe shumë më i drejtpërdrejtë. Ata të afroheshin dhe të përballeshe me ta hapur. Nëse do ta bëja këtë me lojtarët e sotëm, do t'i demotivoja. Nëse ia bëni këtë brezit aktual, ata e shohin si fyerje."
Ten Hag u shkarkua në tetor, pas më shumë se dy vitesh në krye të ekipit. Në sezonin e tij të parë, ai e çoi Unitedin në vendin e tretë në Premierligë, duke siguruar kualifikimin në Ligën e Kampionëve dhe duke fituar Kupën Carabao. Megjithatë, pati një përplasje të ashpër me Ronaldon, i cili deklaroi në një intervistë me Piers Morgan se nuk e respektonte trajnerin.
Sezoni i dytë i Ten Hag ishte shumë më i vështirë. United përfundoi në vendin e tetë, duke regjistruar numrin më të lartë të humbjeve në histori të klubit në Premierligë (14). Konfliktet vazhduan, përfshirë një grindje publike me Sanchon, të cilin ai e kritikoi për mungesë përkushtimi në stërvitje. Lojtari reagoi në mediat sociale, çka çoi në përjashtimin e tij nga ekipi.
Rashford u penalizua nga Ten Hag në janar 2024, pasi raportoi se ishte i sëmurë, mes dyshimeve për një natë të kaluar në Belfast.
Pavarësisht vështirësive, United fitoi FA Cup në maj, duke mundur Manchester Cityn në finale. Kjo çoi në një zgjatje të kontratës së Ten Hag, por pas një fillimi të dobët në sezonin e ri, ai u shkarkua në tetor.
Trajneri holandez pranoi se ka marrë oferta për t'u rikthyer në menaxhim, por nuk do të konsiderojë një punë të re deri më 1 korrik.
