Ten Hag: Fanella e Man. United peshon shumë, këtu mund të luajnë vetëm ata që kanë personalitet të vërtetë
Ten Hag është treguar shumë kritik në konferencë për shtyp pas sfidës së mbrëmshme që fitoi Manchester United 2:1 kundër Evertonit në Kupën FA. Ai tregoi se nuk do të lejojë çfarëdo transferimi të bëhet, pa qenë i sigurt se mund ta bëjë dallimin në skuadër.
Trajneri holandez po përpiqet që të ndryshojë mendësinë e të punuarit në “Old Trafford”. Mendësinë e një klubi që edhe ai vetë e pranon se deri tani nuk është se ka qenë e aftë të reagojë në afatin kalimtar të lojtarëve, duke afruar në organikën e vet lojtarë mesatarë.
Trajneri i “Djajve të Kuq” zotohet se diçka e tillë do të ndryshojë tani e tutje: “Shumica e lojtarëve që janë transferuar në të kaluarën kanë qenë mesatarë. Në Manchester United të qenët mesatar nuk është e mjaftueshme.”
Sipas tij fanella e këtij klubi peshon shumë dhe për këtë arsye do t’i sigurojnë shërbimet e vetëm atyre futbollistëve që mund t’i ndryshojnë ekuilibrat brenda skuadrës.
“Fanella e Manchester United peshon shumë. Këtu mund të luajnë vetëm personalitetet e vërteta, që janë të aftë të luajnë edhe nën presion”, përfundoi ai.
Gjatë afatit kalimtar veror Manchester United shpenzoi një shifër të madhe parash, gjithsej 240 milionë euro, në kampanjën e transferimeve të lojtarëve të ndryshëm.
Ndërkaq tani, në janar, akoma nuk është arritur ndonjë marrëveshje. Gakpo pëlqehej shumë si profil, por Liverpool arriti që ta sigurojë kartonin e tij, duke paguar 42 milionë euro në arkat e PSV.
Gjithsesi, nën drejtimin e Ten Hag transferimi më i shtrenjtë ka qenë ai i Antony, i blerë për 95 milionë euro, i pasuar nga Casemiro që u ble për 70 milionë euro nga Real Madridi.
