Shefi i PSG-së e kritikon Messin për mungesë respekti
Presidenti i Paris Saint-Germain, Nasser Al-Khelaifi, e ka kritikuar yllin argjentinas, Lionel Messi, për mungesë respekti ndaj klubit francez gjatë largimit të tij në verën e vitit 2023.
Kapiteni i Argjentinës tha në shtator se i vjen keq që PSG nuk e nderoi atë pas paraqitjeve të jashtëzakonshme të tij në Kupën e Botës.
“Ai nuk është një djalë i keq, por nuk më pëlqen”, tha Al-Khelaifi për RMC Sport. "Unë do të them, jo vetëm për të, por për të gjithë, ne flasim kur jemi atje, jo kur nuk jemi. Ky nuk është stili ynë... Unë kam respekt të madh për të [Messin], por nëse dikush dëshiron të flas keq për Paris Saint-Germain më pas, kjo nuk është mirë. Ky nuk është respekt”.
Messi shënoi dy herë në finalen e Katarit dhe gjithashtu konvertoi një penallti gjatë ekzekutimit të 11-metërshave, pasi Argjentina fitoi 4:2 në penallti kundër Francës në Kupën e Botës 2022.
“Nëse dikush flet për faktin se ne nuk e festuam mjaftueshëm pasi ai fitoi Kupën e Botës, ne jemi në Francë dhe ai fitoi kundër yllit të Francës dhe PSG-së Kylian Mbappés”, tha Al-Khelaifi. "Ne jemi një klub francez. Unë nuk dua që i gjithë stadiumi të jetë kundër tij."
Al-Khelaifi pranoi se Messi e kishte të vështirë të përshtatej me Parisin pas largimit nga Barcelona në verën e vitit 2021.
“Unë do të them një gjë për Messin, lojtarin më të mirë në botë dhe lojtarin më të mirë në histori”, theksoi Al-Khelaifi. "Nuk ishte e lehtë për të të vinte këtu... Pas Barcelonës. Atje [në Barcelonë], gjithçka ishte për Messin: lojtarët, trajnerët dhe menaxhmenti. Ai vjen këtu dhe nuk është e njëjta gjë, ne gjithashtu kishim lojtarë të tjerë, ne kishim Kylian dhe gjithashtu Neymar”.
