Rooney: Ferguson ende më i madh se Guardiola
Legjenda e Manchester Unitedit, Wayne Rooney, beson se ish-trajneri i tij, Alex Ferguson akoma është mbi trajnerin e Manchester Cityt, Pep Guardiola, kur bëhet fjalë për trajnerin më të mirë të të gjitha kohërave.
Guardiola e udhëhoqi Cityn drejt titullit të katërt radhazi në Premierligë këtë sezon, një arritje e cila nuk u arrit kurrë nga Ferguson apo ndonjë ekip i mëparshëm në historinë e ligës më të mirë të Anglisë. Kjo e çoi totalin e ish- trajnerit të Barcelonës dhe Bayern Munichut në gjashtë tituj të Premierligës në tetë sezonet e tij në Man City.
Por kjo statistikë është prapa rekordit të Fergusonit me 13 kampionate të fituara gjatë 26 viteve të tij në krye të Man Unitedit.
“Unë mendoj se sigurisht që do të ketë argumente se kush është më i mirë, por mendoj se njerëzit kanë tendencë të shikojnë vetëm atë që bëri Sir Alex në Manchester United dhe ajo që bëri ai në Aberdeen ishte e pabesueshme”, tha Rooney në një intervistë me ESPN Brazil.
“Dhe ju do të bënit pyetjen, a mund ta bëjë Guardiola këtë në një ekip si Aberdeen?
“Ka pyetje, ka debat, mendoj se Guardiola për epokën e tij është sigurisht më i miri dhe ai ka ndryshuar mënyrën se si luhet futbolli në mbarë botën… por po për mua Sir Alex, ajo që ai arriti në lojë është e pabesueshme”.
Para se t'i bashkohej Unitedit, Ferguson fitoi tre tituj skocezë me Aberdeen, duke thyer dominimin e gjatë të rivalëve të Glasgow, Celtic dhe Rangers. Ai gjithashtu i udhëhoqi ata drejt fitores ndaj gjigantëve Real Madrid në finalen e Kupës së Fituesve të Kupave Evropiane 1983.
Guardiola, megjithatë, ka avantazhin 3:2 ndaj Fergusonit për sa i përket titujve të Ligës së Kampionëve, me dy të tillë në Barcelonë duke shtuar triumfin e sezonit të kaluar si pjesë e tripletës me Cityn.
Rooney kaloi nëntë vjet duke luajtur nën urdhrat e Ferguson dhe përfundimisht përfundoi karrierën e tij si golashënuesi rekord i klubit. Megjithatë, ai e ka bërë të qartë se ka shumë respekt për Guardiolën dhe në fillim të këtij viti madje sugjeroi se do të ishte i gatshëm të punonte si asistent i spanjollit.
“Nëse Pep Guardiola hyn dhe më kërkon të jem ndihmësi i tij, do të isha i gatshëm”, tha Rooney për podkastin 'Stick to Football'.
“Ju e shihni se çfarë po bën [Mikel] Arteta tani [në Arsenal] dhe unë besoj fuqimisht se mori shumë mësime nga ato çfarë po bënte Guardiola, dhe kështu varet nga situata. Për mua, trajneri më i mirë momentalisht është Pep dhe ju shikoni se si ai përshtatet -- se si ata po luajnë tani nuk është e njëjtë me atë se si luanin katër vjet më parë."
Që atëherë, Rooney është rikthyer vetë në menaxhim, pasi është emëruar shef i skuadrës së Championship, Plymouth Argyle.
