Real Madridi përgatitet për ndryshime: Largohet Tchouameni, e vjen Rodri
Mesfushori Aurelien Tchouameni është vendosur në shitje nga Real Madridi, të cilët duan ta transferojnë fituesin e Topit të Artë Rodri.
“Los Blancos” nuk janë të lumtur me mënyrën si po iu funksionon mesfusha, me Tchouamenin që është “zhdukur” së fundmi, ku assesi s’po e gjen formën e duhur duke dëshpëruar vazhdimisht në paraqitje.
Reali investoi plot 80 milionë euro për francezin, ndërsa tani po konsiderojnë ta shesin ngase ka dështuar për ta zëvendësuar Casemiron, pavarësisht që vitet e kaluara ishte i paprekshëm.
Në fakt, për këtë arsye, Tchouameni u la në stol në përballjen ndaj Borussia Dortmundit si dhe ishte lojtari i parë që u largua nga fusha në turpërimin ndaj Barcelonës.
Reali ka pritur që francezi ta kontrollonte tërë mesfushën ngase ka pasur dy vite kohë për t’u ambientuar, e sidomos këtë sezon që vuajnë pa Toni Kroosin. Megjithatë, deri më tani klubi ka mbetur jashtëzakonisht i pakënaqur.
“Relevo” raporton se “Los Blancos” tani po e mbështesin më shumë Edouardo Camavingan si dhe po konsiderojnë të tentojnë transferimin e yllit të Manchester Cityt Rodri.
Të gjithë brenda klubit madrilen e duan spanjollin, kontrata e të cilit skadon më 2026. Reali pritet të provojë t’ia ndryshojë mendjen për rinovim dhe në rast që lojtari refuzon, atëherë kanë gjasa reale për ta blerë në verë.
