Real Madridi dhe PSG-ja pas dyshes fantastike të Interit
Mediumi italian, Tuttosport, raporton se Real Madridi dhe Paris Saint-Germain, janë interesuar për dyshen fantastike të Interit, Marcus Thuram dhe Alessandro Bastoni, por Zikaltrit dëshirojnë 80 milionë për secilin nga yjet.
Gjigantët e La Ligës, Real Madrid janë të interesuar për mbrojtësin e Interit dhe Italisë, Bastoni, ndërsa PSG po monitoron shokun e tij të skuadrës Thuram raporton Tuttosport të premten.
Sipas gazetës me bazë në Torino, Carlo Ancelotti ka kërkuar një qendërmbrojtës të ri në Madrid këtë verë dhe Bastoni është një nga emrat në listën e Mbretërve. Bastoni është gjithashtu një objektiv i Manchester Cityt, por nënshkrimi i Josko Gvardiol verën e kaluar e bën të pamundur një ofertë nga Mançesteri.
Gazzetta raportoi muajin e kaluar se Bastoni ishte një nga pesë yjet e Serie A-së që mund të largohej në verë me një ofertë adekuate, por italiani tha në një intervistë të fundit se ai nuk po mendon të largohet nga San Siro aktualisht.
Në të njëjtën kohë, PSG-ja po monitoron nga afër francezin Thuram, i cili gjithashtu është nën kontratë me Interin. Gjigantët e Ligue 1 ishin në bisedime me 26-vjeçarin një vit më parë, para transferimit të tij si lojtar i lirë në Stadio Meazza.
Raportohet se Zikaltrit nuk do t'i shesin yjet e tyre për më pak se 80 milionë euro për secilin, por që nëse një ofertë aq e lartë do të arrinte, Interi do të ishte i gatshëm për të negociuar.
