Real Madrid i gatshëm t'i ofrojë Bellinghamit 12 milionë euro për vit

Real Madrid e ka mjaft seriozisht për transferimin e mesfushorit Jude Bellingham nga Borussia Dortmund.

"Los Blancos" duan ta përforcojnë edhe më shumë mesfushën andaj e kanë bërë prioritet nënshkrimin me anglezin, i cili ka shkëlqyer këto vitet e fundit sidomos edhe në Kupën e Botës.

Pavarësisht që u raportua se Liverpool ishte favorit, tani situata ka ndryshuar me spekulimet e fundit që e dërgojnë atë në "Santiago Bernabeu", pasi Bellingham nuk mendon rikthimin në Angli për momentin.

Mediumi "PacojoSer" ka zbuluar disa prapaskena të ofertës që mund të bëjë Real Madrid, e një ndër to është që madrilenët do t'i ofrojnë anglezit plot 12 milionë euro pagë sezonale.

Kontrata si gjithnjë pritet të jetë për pesëvjeçare me një klauzolë lirimi në vlerën 1 miliardë euro, siç kanë bërë me talentë si Rodrygo dhe Vinicius Junior, në mënyrë që mos t'i lejojnë të largohen.

Ndërsa, sa i përket kartonit të anglezit, Reali do të ofrojë 100 milionë euro për ta kompletuar këtë marrëveshje, edhe pse raportohet se Dortmund e vlerëson në vlerën e 150 milionë eurove.

Mirëpo, duke marrë parasysh lidhjen e fortë mes dy skuadrave atëherë situata mund të ndryshojë dhe të shtohen disa milionë të tjerë me anë të bonuseve.

Interesim për Bellinghamin kanë edhe top gjigantët evropianë si Liverpool, Manchester City, Chelsea dhe Paris Saint-German.