Qazim Laçi: Jemi me meritë në EURO 2024, duam pikët e plota në ndeshjen e parë

Mesfushori i Kombëtares së Shqipërisë, Qazim Laçi, sot (e mërkurë) doli në konferencë për shtyp, ku më shumë foli rreth sfidës ndaj Italisë, duke thënë se duan pikët e plota në ndeshjen e parë.

Laçi tha se Shqipëria ka arritur në këtë fazë me meritë dhe se po japin maksimumin të gjithë në stërvitje, për ta nisur sa më mirë rrugëtimin në Evropian.

Si kanë shkuar përgatitjet dhe a mendon se do ta nisësh si titullar ndaj Italisë? – Kemi bërë shumë mirë. Organizimi është shumë i mirë nga stafi dhe FSHF, si në Austri dhe në Gjermani. Kemi punuar shumë mirë dhe po punojmë që të jemi gati për ndeshjen me Italinë. Se kush nis nga fillimi e vendos trajneri. Të gjithë lojtarët janë gati, djemtë po punojnë shumë fort. Si të luajmë 1 minutë, si nga fillimi, si 5 minuta, duhet të jemi të gjithë në dispozicion të trajnerit dhe do të japim maksimumin.

Mesfusha e Italisë? – Sigurisht që do të jetë një përballje shumë e vështirë. Që nga shorti ne e dinim që do ishte një ndeshje shumë e rëndësishme për ne. Të gjithë lojtarët po japim maksimumin dhe duhet të luftojmë deri në fund për të marrë maksimumin e pikëve.

Sa e rëndësishme është të marrim rezultat pozitiv me Italinë për ndeshjet e tjera? – Ndeshja e parë është pak më e vështirë për të gjitha ekipet, si për ne si për Italinë. Ne kemi arritur deri këtu me shumë meritë. Kemi dhënë maksimumin në kualifikuese, kemi bërë ndeshje të mira dhe kështu do të vazhdojmë. Të punojmë sa më mirë, të stërvitemi dhe të mundohemi që të shfaqim ato gjëra që jemi stërvitur edhe në fushë. Objektivi ynë është që të marrim maksimumin e pikëve te ndeshja e parë.

Konkurrenca në ekip? – Është konkurrencë shumë pozitive. Lojtarët janë të barabartë në Kombëtare dhe janë grumbulluar futbollistët më në formë të momentit. Ka shumë konkurrencë në të gjitha repartet, të gjithë po japim maksimumin për të arritur sa më lart. Çdo lojtarë duhet të japi maksimumin.

Me cilin nga ekipet mezi po e pret përballjen? – Të tre kundërshtarët tanë janë shumë të fortë. Secili prej tyre ka cilësitë e veta dhe është e vështirë të bëj një zgjedhje. Çdo ekip ka lojtar me diferencat dhe karakteristikat e veta. T’i marrim ndeshjet me radhë.

A është Shqipëria gati për ndeshjen e parë me Italinë? – Patjetër, të gjithë lojtarët janë gati. Fatmirësisht nuk kemi pasur asnjë dëmtim, kjo është kryesorja. Mezi po presim që të vazhdojë “EURO 2024”. Ndeshja e parë do jetë pak me stres pasi është takimin i parë. Por të gjithë lojtarët janë shumë të motivuar dhe kjo është shumë pozitive për ne.

Këshillat që keni marrë nga lojtarët që vijnë për herë të dytë në Kombëtare – Nuk kanë thënë gjëra specifike. Këto lojtarë me eksperiencën që kanë na kanë ndihmuar në çdo stërvitje dhe ndeshje, se si të paraqitemi, çfarë duhet të specifikojmë, në mënyrë që të përballemi me kundërshtarët në grup.

Sa presion ka Shqipëria në këtë grup?- Në ndeshjet kualifikuese kemi bërë shumë mirë. E mbyllëm të parët sepse e merituam. Edhe në Evropian jemi me këmbë në tokë. Sigurisht do të jetë shumë e vështirë, pasi është një grup i fortë. Italia, Spanja dhe Kroacia janë shumë ekipe të forta. Por ne do ta shijojmë dhe do të japim maksimumin, pasi kjo fanellë që po veshim, vlen shumë.