PSG sytë te Luis Diaz për ta zëvendësuar Mbappen, Liverpooli i vendos çmim marramendës

Raportohet se Paris Saint-Germain po kërkon me ngulm zëvendësuesin e Kylian Mbappes, ku tani ka lëshuar sytë te ylli i Liverpoolit, Luis Diaz, por skuadra angleze i ka vendosur një çmim marramendës prej 145 milionë eurove atij.

Me Mbappe që pritet t'i bashkohet Real Madridit këtë verë, PSG e ka kthyer vëmendjen te anësori i të kuqve Diaz, sipas El Pais Colombia. Raportimi thotë se me largimin e trajnerit Jurgen Klopp nga Anfield në fund të sezonit, ka pikëpyetje për të ardhmen e 27-vjeçarit. Megjithatë, është pohuar se reprezentuesi kolumbian mund të kushtojë midis 120-145 milionë euro (102-123 milionë £/131-164 milionë dollarë).

Saga e gjatë e transferimit të Mbappes dhe largimi i afërt i Klopp janë dy nga historitë më të mëdha të futbollit aktualisht dhe si PSG ashtu edhe Liverpool po përballen me një epokë të re, të pasigurt pa dy figura ikonike. Ruajtja e suksesit në krye është çelësi, prandaj gjetja e zëvendësuesve idealë sa më shpejt që të jetë e mundur do të jetë jetike për të siguruar një të ardhme pa probleme për sezonin e ardhshëm.

Diaz, kontrata e të cilit me Liverpool është deri në vitin 2027, pasi nënshkroi nga FC Porto në 2022 për 40 milionë funte (51.3 milionë dollarë/47 milionë euro), është gjithashtu një objektiv i raportuar për Barcelonën dhe AC Milan. Ai ka shënuar 11 gola dhe ka bërë pesë asistime deri më tani këtë sezon.

Diaz dhe Liverpool do të kthehen në veprim të enjten në ndeshjen e dytë të raundit të 1/8 së finales së Ligës së Evropës kundër Sparta Pragës. Të kuqtë, të cilët do të përballen me Manchester United në çerekfinale të FA Kupës tre ditë më vonë, fituan ndeshjen e parë 5:1 dhe janë me një këmbë edhe në këtë garë në çerekfinale.