Problem mbetet çmimi, Chelsea dhe Arsenal larg marrëveshjes për Balogun
Chelsea dëshiron të nënshkruajë me sulmuesin Folarin Balogun nga Arsenal, por të dy klubet janë shumë larg marrëveshjes shkaku i vlerësimit të lojtarit.
Balogun ka kërkuar të largohet nga “Topçinjtë” në këtë afat veror dhe thuhet se është i hapur për t’iu bashkuar rivalit lokal.
22-vjeçari është i dëshpëruar që të luajë më shumë minuta këtë edicion pas një sezoni fantastik në formë huazimi te Reims.
Arsenal është i hapur për shitjen e amerikanit mirëpo që kërkon rreth 50 milionë funte për ta lejuar të largohet, çmim të cilin Chelsea e ka vlerësuar si shumë të lartë.
Sidoqoftë, mungesa e Christopher Nkunkut për disa muaj ka ndikuar që “Blutë” të kenë nevojë për një sulmues dhe mund t’i vendosin presion lojtarit.
Balogun është duke u kërkuar me ngulm edhe nga disa klube tjera, si rasti i Interit që e kanë kërkuar gjatë tërë afatit veror mirëpo nuk duan ta paguajnë vlerën e vendosur nga Arsenali.
Monaco gjithashtu bëri një ofertë për shërbimet e amerikanit, mirëpo Arsenal e refuzoi edhe pse lojtari kishte pranuar t’i bashkohej gjigantit francez.
Klubet e tjera që kanë shprehur interesim janë West Ham, Fuham dhe rivali lokal Tottenham.
