Pozicioni i Thiago Mottës te Juventusi në rrezik, Conte mbetet “ëndrra e madhe”
Raportimet nga Italia sugjerojnë se pozicioni i Thiago Motta te Juventusi nuk është i sigurt, pavarësisht pretendimeve të Cristiano Giuntolit, ndërsa mediat kanë përmendur katër kandidatë të mundshëm për ta zëvendësuar ish-mesfushorin e Italisë.
Raportet tregojnë se trajneri i Juventusit, Thiago Motta, është nën vëzhgim, edhe pse drejtori i klubit, Giuntoli, ka mohuar këtë pas eliminimit “të turpshëm” të Juventusit nga Empoli në Kupën e Italisë.
Sipas Tuttosport dhe Gazzetta dello Sport, Motta duhet të përmirësojë marrëdhëniet me disa lojtarë dhe stilin e tij të lojës në 12 ndeshjet e mbetura të sezonit. Nëse dështon, as një vend në top katërshe nuk mund ta shpëtojë nga shkarkimi.
Të dy gazetat përmendin disa kandidatë të mundshëm për të marrë drejtimin e Juventusit në rast të një largimi të Mottës në fund të sezonit.
Sipas tyre, Gian Piero Gasperini, Antonio Conte dhe Igor Tudor janë alternativat kryesore nëse Juventusi vendos të ndërrojë trajnerin. Gazzetta e cilëson Conten si "ëndrrën e madhe" të klubit.
Megjithatë, nëse Bianconerët vendosin të ndryshojnë trajnerin këtë verë, ata duan ta bëjnë këtë para fillimit të Kupës së Botës për Klube më 14 qershor. Rregulloret aktuale nuk lejojnë asnjë klub të Serie A të punësojë një trajner nga një ekip tjetër i ligës para përfundimit zyrtar të sezonit më 30 qershor.
Tuttosport shton gjithashtu ish-trajnerin e Italisë, Roberto Mancini, në listën e mundshme të Juventusit. Legjenda e Sampdorias ka qenë në kontakt me disa klube kryesore të Serie A përmes përfaqësuesve të tij gjatë muajve të fundit.
Motta nënshkroi një kontratë trevjeçare me Juventusin verën e kaluar, e cila skadon në qershor 2027.
