Pique thotë se Messi bëri që futbolli në ShBA të zgjerohet
Gerard Pique ka lavdëruar ish-bashkëlojtarin e tij te Barcelona, Lionel Messin, duke thënë se ai është shkaktari që futbolli në ShBA është rritur në këtë formë, me transferimin e tij në MLS.
Pique thotë se transferimi i superyllit 36-vjeçar te Inter Miami verën e kaluar ka kontribuar masivisht në zgjerimin e sportit në Shtetet e Bashkuara. Ish-mbrojtësi i Barcelonës dhe Spanjës sugjeroi gjithashtu që Messi të siguroi titullin e 'GOAT' njëherë e mirë pas triumfit të tij në Kupën e Botës 2022 në Katar me Argjentinën.
Duke folur për ESPN, Pique tha: "Unë e shoh Leon të lumtur, ai përmbushi të gjitha ëndrrat e tij kur filloi të luante. Kupa e Botës ishte mishërimi i gjithçkaje dhe mendoj se në Miami ai po zgjeron futbollin. Me imazhin e tij dhe faktin e lojës në MLS, ai bëri që Shtetet e Bashkuara të fitonin më shumë forcë”.
Ai shtoi për statusin e Messit në historinë e lojës: "Njerëzit e futbollit donin që Messi të bëhej kampion bote. Sidomos për shkak të dyshuesve që vunë në pikëpyetje karrierën e tij dhe thanë se atij i mungonte një Kupë e Botës. Unë mendoj se nuk ka më dyshime. Ai është lojtari më i mirë në historinë e futbollit. Ai e ngriti Barcelonën në një dimension tjetër”.
Tetë herë fituesi i Topit të Artë e nisi me stil sezonin 2024 MLS teksa kontribuoi me një asist në fitoren e The Herons kundër Real Salt Lake. Në sezonin e tij të parë me klubin, legjenda e Barcelonës shënoi 11 gola në 14 paraqitje, dhe Miami konsiderohet të jetë pretendent për Kupën MLS këtë herë vetëm për shkak të pranisë së tij.
Skuadra në pronësi të David Beckham do të shihet në veprim të hënën në MLS teksa do të përballet me LA Galaxy në ndeshjen e tyre të dytë të sezonit. Miami do të presë Orlando Cityn katër ditë më vonë, pasi ndeshjet vijnë të dendura dhe të shpeshta për skuadrën e Gerardo Martinos.
