Perez këmbëngul se Ancelotti do të qëndrojë te Real Madridi

Presidenti i Real Madridit, Florentino Perez, u përpoq t’i jepte fund spekulimeve për të ardhmen e trajnerit italian, Carlo Ancelotti, pas triumfit në finale të Kupës së Mbretit gjatë mbrëmjes së djeshme.

Presidenti ishte në humor të shkëlqyeshëm pasi mbretërit fituan Kupën e Mbretit për herë të 20-të pas një fitoreje të vështirë ndaj Osasuna në Sevilla. Me shumë spekulime që e lidhnin Ancelottin me kombëtaren braziliane, Perez më në fund u tregua këmbëngulës për këtë çështje duke thënë se trajneri i tij është nën kontratë deri në vitin 2024 dhe nuk do të largohet nga kryeqyteti spanjoll këtë verë.

Futboll / Triumfi i 20-të në finalen e 40-të për Real Madridin, mbretërit triumfojnë në finale të Kupës së Mbretit ndaj Osasunës

Perez konfirmoi: "Nuk dua të dëgjoj më për këtë temë. Ai ka një kontratë dhe ne jemi të gjithë të lumtur me të".

"Jam shumë i lumtur, sepse çdo herë që fiton një titull është një arsye për të qenë i lumtur. Të gjithë titujt fitohen me shumë përpjekje dhe sakrifica. Dua të përgëzoj Osasunën për sezonin që ka pasur, ata kanë punuar me gjithë zemër dhe duhet dhënë respekt”.

Spekulimet për largimin e Ancelottit kishin qenë befasuese duke pasur parasysh suksesin e jashtëzakonshëm të italianit që nga rikthimi në Madrid në verën e vitit 2021. Triumfi i së shtunës mbrëma do të thotë që Real Madridi ka fituar një Kupë të Spanjës, një titull lige, një Ligë të Kampionëve, Superkupë spanjolle dhe evropiane dhe një Kupë e Botës për Klube në periudhën e dytë të Ancelottit në stolin e Real Madridit - të gjitha gjatë tranzicionit në një skuadër më të re.

Ka shumë pak kohë për të festuar pasi Ancelotti dhe mbretërit përgatiten për ardhjen e një skuadre në dukje të pandalshme të Manchester Cityt të martën mbrëma në ndeshjen e parë gjysmëfinale të Ligës së Kampionëve.