Pamje: Sulm racist me banane ndaj yllit të Brazilit

Ylli i Brazilit dhe i Tottenham Hotspurit, Richarlison, u bë cak i një sulmi racist në një ndeshje miqësore të zhvilluar në Paris ndërmjet Brazilit dhe Tunizisë. Ai u gjuajt me banane në momentin kur po festonte golin e shënuar, e që ishte goli për kthimin e epërsisë për kombëtaren e tij në 2:1, ndërsa ndeshja përfundoi me fitore bindëse 5:1 të kombëtares së tij.

Sulmuesi i Tottenhamit, Richarlison beson se racizmi do të vazhdojë "çdo ditë dhe kudo" nëse nuk jepet ndëshkimi për personat që vazhdimisht e bëjnë këtë.

Incidenti ndodhi kur ish-lojtari i Everton vrapoi drejt flamurit të këndit për të festuar pasi shënoi golin e dytë të skuadrës së tij në një fitore 5-1 në Parkun e Princave.

Pamjet treguan mesfushorin e Manchester United, Fred, duke e larguar bananen. Në fushë janë hedhur edhe objekte të tjera.

Përkthyer nga portugalishtja, Richarlison postoi në Twitter: "Për sa kohë që ata qëndrojnë 'blah blah blah' dhe nuk ndëshkojnë, do të vazhdojë kështu, duke ndodhur çdo ditë dhe kudo. Nuk ka kohë vëlla!”

25-vjeçari mori shumë mesazhe mbështetjeje në mediat sociale, duke përfshirë nga ish-klubet e tij América Mineiro dhe Fluminense.

Para ndeshjes, pesë herë kampionët e botës po fotografoheshin me një pankartë kundër racizmit ku shkruhej: "Pa lojtarët tanë me ngjyrë, ne nuk do të kishim yje në bluzat tona".

Federata Braziliane e Futbollit (CBF) lëshoi një deklaratë në lidhje me incidentin e Richarlisonit përmes Twitterit. Aty shkruhej: “Fatkeqësisht një banane u hodh në fushë drejt Richarlison, shënues i golit të dytë për Brazilin. CBF përforcon pozicionin e saj për të luftuar racizmin dhe hedh poshtë çdo manifestim të paragjykimit.”

Presidenti i CBF Ednaldo Rodrigues shtoi: “Edhe një herë, vij publikisht për të shprehur refuzimin tim. Këtë herë e pashë me sytë e mi. Kjo na trondit. Duhet të kujtojmë gjithmonë se jemi të gjithë njësoj, pavarësisht nga ngjyra, raca apo feja. Lufta kundër racizmit nuk është një kauzë, por një [betejë] themelore për ndryshim për të zhdukur këtë lloj krimi nga planeti. Unë insistoj të them se dënimet duhet të jenë më të rënda.”

Goli i Richarlison e ktheu Brazilin në avantazh pasi Montassar Talbi barazoi rezultatin 1:1 pas golit të hapjes nga Raphinhas. Neymar shënoi një penallti, Raphinha shënoi golin e tij të dytë personal, para se Pedro të shënonte golin e fundit për rezultatin përfundimtar 5:1, ndërsa vlen të ceket se Tunizia luajti që nga minuta e 42-të me një lojtar më pak pasi nga loja u përjashtua Dylan Bronn me karton të kuq direkt.