Odegaard: Rivaliteti me Cityn është i natyrshëm, duam të jemi më të mirët
Rivaliteti i zjarrtë mes Arsenalit dhe Manchester Cityt është një nënprodukt i natyrshëm i dëshirës së të dy skuadrave për të qenë më të mirët, tha kapiteni i klubit nga Londra Veriore, Martin Ødegaard, përpara ndeshjes së tyre në Premierligë, e cila do të zhvillohet të dielën në Emirates Stadium.
Arsenali përfundoi nënkampion ndaj Cityt në sezonin 2022-2023 dhe e çoi garën për titullin e Premierligës deri në ditën e fundit sezonin e kaluar, përpara se të përfundonte edhe një herë në vendin e dytë pas skuadrës së Pep Guardiolës.
Temperaturat u ndezën gjatë takimit të tyre të fundit në shtator, kur bashkatdhetari norvegjez i Ødegaard, Erling Haaland, hodhi topin në drejtim të mbrojtësit të Arsenalit, Gabriel Magalhães, dhe shkëmbeu fjalë të nxehta me trajnerin Mikel Arteta, duke i kërkuar atij të "qëndronte i përulur".
"Unë mendoj se në futboll, në ndeshje si kjo, emocionet janë shumë të larta dhe adrenalina është në maksimum. Këto gjëra ndodhin në fushë, por pasi ndeshja përfundon, gjithçka mbetet pas," tha Ødegaard.
"Nuk është diçka për të cilën mendoj shumë. Mendoj se është normale që në ndeshje të mëdha të ketë një rivalitet të madh. Po garojmë dhe duam të jemi më të mirët. Kështu duhet të jetë dhe nganjëherë tensionet rriten. Por mendoj se shumë lojtarë e njohin njëri-tjetrin nga ekipet kombëtare – Anglia, Brazili, unë me Erling – kështu që në fushë dhe jashtë saj është pak ndryshe. Kur jemi në fushë, është një betejë e vërtetë".
Manchester City renditet i katërti në Premierligë me 41 pikë, ndërsa Arsenali, në vendin e dytë me 47 pikë, është gjashtë pikë prapa liderit Liverpool, i cili ka një ndeshje më pak.
