Një tjetër yll i Juventusit mund të dënohet rëndë, dyshohet se luajti baste në platforma të paligjshme
Mesfushori i Juventusit, Nicolo Fagioli, mund të përballet me një dënim deri në tre vite, pasi siç raportohet në mediat italiane, ai është nën hetime për baste të vëna në platforma të paligjshme, duke përfshirë ndeshjet e Zonjës së Vjetër.
Prokuroria e Torinos po shqyrton aktivitetin e dyshuar të 22-vjeçarit në platformat e paautorizuara të lojërave të fatit në internet, sipas Tuttosport.
Avokati i italianit thotë se Fagioli është vetëdorëzuar në sistemin e drejtësisë sportive dhe se është i qetë për situatën.
Megjithatë, nëse shpallet fajtor për akuzat, ai mund të përballet me rreth tre vjet jashtë loje.
“Nicolo është i qetë dhe është plotësisht i përqendruar te Juventusi dhe kampionati”, tha avokati i tij. “Në cilësinë tonë të avokatëve të Nicolo Fagiolit, në lidhje me lajmet që dolën sot në shtyp, mund të dëshmojmë se klienti ynë po e trajton çështjen me përgjegjësi, me synim transparencën maksimale dhe bashkëpunimin me autoritetet gjyqësore të zakonshme dhe sportive, siç tregohet nga fakti se ai ishte i pari që veproi me shpejtësi ndaj Prokurorisë Federale”.
Fagioli tashmë është marrë në pyetje nga Federata Italiane e Futbollit (FIGC) për këtë çështje. Prokurorët thuhet se kanë hapur hetimet në fund të gushtit, që do të thotë se çështja mund të zgjidhet deri në nëntor.
Rasti lindi kur hetuesit shikuan transaksionet e faqeve të internetit të lojërave të fatit që funksiononin pa licencë dhe zbuluan emrin e Fagiolit. Shkelje të tilla zakonisht rezultojnë me gjobë, por duke qenë se Fagioli është një sportist profesionist dhe anëtar i një federate, dënimi mund të jetë më i rëndë.
Lajmi do të jetë shqetësim për Juventusin, i cili tashmë është pa mesfushorin Paul Pogba, i cili përballet me një pezullim të gjatë pasi doli pozitiv për një substancë të ndaluar.
Fagioli ka qenë pjesë e rregullt e skuadrës së Allegrit këtë sezon, pasi është paraqitur gjashtë ndeshje në Serie A dhe ka fituar një paraqitje për Italinë.
