Ndeshja Fiorentina-Empoli rrezikon të ndez debat për kombin në Kosovë
Jemi mësuar të dëgjojmë për kamerunas të natyralizuar në francezë, brazilianë të natyralizuar në spanjollë, ganezë të natyralizuar në gjermanë, nigerianë të natyralizuar në italianë e kosovarë të natyralizuar në zviceranë. Por, deri tash nuk kemi dëgjuar komentatorë derisa përmendin që “një kosovar është natyralizuar në shqiptar”.
Ja që, edhe kjo ka ndodhur në ndeshjen e Serie A mes Fiorentinas dhe Empolit.
Pas lëndimit të futbollistit Lorenzo Tonelli, në lojë u fut futbollisti Ardian Ismajli dhe u prezantua nga komentatori në këtë formë.
"Hyn në lojë lojtari me kombësi kosovare, Ismajli, i cili është natyralizuar si shqiptar së fundmi" - u shpreh komentatori i Sky Sports.
Por, a është e vërtetë një gjë e tillë?
Edhe pse mund të tingëllojë e çuditshme, një gjë e tillë është e vërtetë. Ardian Ilmi Ismajli është lindur më 30 shtator të vitit 1996 në Majanc të Podujevës dhe me Shqipërinë nuk e lidh asgjë përveç historisë së kombit të tij.
Madje, Ardian Ilmi Ismajli e ka një të kaluar të fortë me Kosovën. Ai ka kryer shkollën e futbollit te 2 Korriku i Prishtinës, dhe jo në ndonjë akademi të futbollit në Shqipëri.
Për më tepër, përgjatë karrierës së tij – tashmë shtatë vjeçare- Ismajli asnjëherë nuk ka luajtur për një ekip nga Shqipëria, siç kanë bërë lojtarë të tjerë kosovarë.
Nga Prishtina ai kishte shkuar në Kroaci që të luante për Hajdukun e Splitit, e ku i kaloi katër vite shumë të mira si futbollist.
Prej vitit 2020, Ismajli është bërë pjesë e kategorisë elitare të futbollit italian, duke luajtur fillimisht për Spezian e së fundi për Empolin.
Ardian Ismajli kishte luajtur për kombëtaren e Kosovës, kategoritë e reja, gjatë viteve 2017 dhe 2018.
Madje, ai ishte bërë kapiten i kombëtares së Kosovës për U-21.
Përveç kësaj, Ismajli kishte luajtur një ndeshje edhe me kombëtaren A të Kosovës në vitin 2018 por... në mënyrë të papritur kishte ndërruar anë.
Ai ishte pajisur me pasaportë të Republikës së Shqipërisë (duke u natyralizuar kësisoj) dhe kishte ndërruar ngjyrat e kombëtares.
Nga kapiten te Kosova u-21 ai ishte futur në kombëtaren A të Shqipërisë.
Për Shqipërinë, Ismajli deri tash ka luajtur 23 herë dhe e ka shënuar një gol.
Ky ishte pra i gjithë procesi që ‘natyralizoi’ Ismajlin nga kosovar në shqiptar. Sidoqoftë, një qëndrim i tillë do të protestohej nga tifogrupet tona që e shohin kombin të lidhur kryekëput me etninë dhe jo pasaportën e shtetësinë dhe një gjë e tillë rrezikon të çelë një debat të madh mbi kombin kosovar, përsëri.
Kujtojmë që Federata e Futbollit të Kosovës (FFK) ishte kritikuar ashpër që kishte lejuar largimin e tij nga Kosova.
