Mohamed Salah: Ky është sezoni im më i mirë te Liverpooli
Sulmuesi i Liverpoolit, Mohamed Salah, beson se ky sezon është më i miri i tij ndonjëherë në Anfield, pasi ai vazhdon të vendosë ritmin për gola dhe asistime në Premierligë.
Goli dhe asistimi i Salah në fitoren 2:0 të së dielës ndaj Manchester Cityt e bënë atë lojtarin e parë në pesë ligat më të mira të Evropës që ka tejkaluar 50 kontribute direkte në gola, me 30 gola dhe 21 asistime në të gjitha garat deri më tani këtë sezon.
Forma mbresëlënëse e egjiptianit e ka ndihmuar Liverpoolin të krijojë një diferencë prej 11 pikësh në krye të tabelës së Premierligës, si dhe e ka vendosur atë në garën për të fituar Topin e Artë të këtij viti.
“Unë mendoj se ky është sezoni im më i mirë”, tha Salah për TNT Sports.
“Deri tani, mendoj se është sezoni im më i mirë sepse i ndihmoj lojtarët e tjerë rreth meje të përmirësohen – kjo është ajo që ndjej. Unë njoh mënyrën e lojës së tyre, të gjithë numrat rreth lojtarëve janë më të lartë se sezonet e tjera, plus asistimet e mia janë më të shumta, gjë që do të thotë se i ndihmoj shumë. Nëse e shikoni nga ky këndvështrim, Cody Gakpo, Lucho Díaz, dhe lojtarët e tjerë kanë një sezon më të mirë se më parë, dhe kjo më bën të besoj se ky është sezoni im më i mirë, sepse i bëj lojtarët rreth meje më të mirë."
Salah, së bashku me kapitenin e Liverpoolit, Virgil van Dijk, dhe zëvendëskapitenin Trent Alexander-Arnold, janë në vitin e fundit të kontratës së tyre. Ndërsa pritet që ai të dakordohet për një marrëveshje të re në Anfield, 32-vjeçari mbetet i rezervuar në lidhje me gjendjen e negociatave.
I pyetur nëse ka ndonjë përditësim mbi kontratën e tij, Salah u përgjigj: “Në një mënyrë shumë të sjellshme, jo.”
I pyetur se si do të donte të mbahej mend te Liverpooli, sulmuesi shtoi:
"Dua që tifozët të kujtojnë se ua dhashë gjithçka, i dhashë gjithçka qytetit. Isha këtu, nuk isha dembel, thjesht e shijova futbollin tim dhe i dhashë gjithçka që kisha."
"Unë mendoj se ky është thelbi i qytetit – ata të japin dashuri dhe ti ke një lidhje të veçantë me ta sepse u jep gjithçka. Unë dua që ata të kujtojnë se isha këtu për tetë vjet dhe i dhashë gjithçka që kisha."
