Messit s'i zgjat dënimi, kthehet në stërvitje me PSG-në

Lionel Messi është rikthyer në stërvitje me Paris Saint-Germainin të hënën paradite, pasi klubi ka vendosur t’ia heqë pezullimin për udhëtimin pa leje drejt Arabisë Saudite javën e kaluar.

Argjentinasi kërkoi falje në fundjavë ndaj klubit dhe ndaj bashkëlojtarëve për udhëtimin dyditorë në Lindjen e Mesme në fillim të javës së kaluar.

Futboll / “Po pres të shoh çfarë do të vendos klubi”, Lionel Messi kërkon falje për udhëtimin në Arabinë Saudite

PSG-ja e pezulloi 35-vjeçarin për dy javë pa pagesë, por vendosi ta lejojë të kthehet në stërvitje menjëherë këtë të hënë pasi e pa se u pendua për veprimin e bërë.

Ai mungoi në fitoren e PSG-së 3:1 kundër Troyes në Ligue 1 të dielën, por do të jetë i gatshëm për ndeshjen e radhës të shtunën kundër Ajaccios.

Messi do të rikthehet në ekipin e parë të trajnerit Christophe Galtier me shpresën për t’i ndihmuar PSG-së ta fitojë titullin, pasi ka një epërsi prej gjashtë pikëve ndaj Lens kur kanë mbetur vetëm edhe katër ndeshje deri në fund të sezonit.

Messi, bashkëshortja e tij Antonela Roccuzzo dhe fëmijët e tyre, udhëtuan drejt Arabisë Saudite të hënën e kaluar në kuadër të rolit të argjentinasit për ta promovuar vendin e Lindjes së Mesme.

Ata u fotografuan duke e shijuar kohën në kryeqytetin Riad dhe në Diriah.

Lojtarët e PSG-së e kishin pushim të hënën e kaluar sipas orarit, por pasi u mposhtën 3:1 nga Lorienti një ditë më herët, trajneri Galtier i urdhëroi ata të dalë në stërvitje ditën e pushimit.

Messi, megjithatë, ishte tashmë rrugës drejt Arabisë Saudite – një vend në të cilin ai mund të luajë së shpejti – dhe nuk ishte në gjendje të kthehej.

Për shkak se udhëtimi i tij nuk ishte aprovuar nga Galtier apo drejtori sportiv Luis Campos, PSG-ja e pezulloi Messin për 15 ditë pa pagesë.

Të premten, Messi i kërkoi falje klubit dhe bashkëlojtarëve që mungoi në stërvitje, përmes një postimi në rrjetet sociale.

Kontrata e tij me klubin do të mbarojë në fund të këtij sezoni dhe besohet se Messi do të largohet nga PSG-ja në verë si lojtar i lirë.