Marotta: Inzaghi është dhe do të vazhdojë të jetë trajner i Interit

Drejtori ekzekutiv i Interit, Beppe Marotta, ka konfirmuar se skuadra e tij nuk do të bëjë ndryshime në stafin menaxhues, ku Simone Inzaghi do të vazhdojë të qëndrojë në postin e trajnerit të paktën edhe për një sezon.

Më herët gjatë sezonit, pati zëra të fortë se Inzaghi do të largohej në fund të sezonit 2022-23, pas një ecurie zhgënjyese në Serie A, e cila atë kohë e bënte të pamundur kualifikimin në Ligën e Kampionëve.

Futboll / Tuttosport: Inzaghi do të largohet nga Interi edhe nëse fiton Ligën e Kampionëve

Megjithatë, në muajt e fundit, Inzaghi e ka kthyer rrjedhën në sezonin e Interit, duke i ngritur zikaltrit përsëri në katër pozitat e para në tabelën e ligës, si dhe duke arritur në finalen e Kupës së Italisë dhe Ligës së Kampionëve, falë dy fitoreve mbresëlënëse të shënuara respektivisht ndaj Juventusit dhe Milanit.

Kaq mbresëlënës ka qenë kthesa e sezonit të Interit, saqë hierarkia e klubit ka ndryshuar plotësisht qëndrimin e tyre për të ardhmen e trajnerit të tyre, edhe nëse Marotta pretendon se nuk kishte pasur kurrë asnjë dyshim mbi aftësitë e Inzaghit.

Duke folur për Rai Italia, Marotta i dha Inzaghit mbështetjen e tij të plotë, duke këmbëngulur: “Këtë vit nuk kemi menduar kurrë, as për një sekondë, të zëvendësojmë Inzaghin. Ai arriti të forcojë pozicionin e tij falë paraqitjeve të ekipit që janë rezultat i drejtimit të tij teknik. Shanset që Inzaghi të qëndrojë, e shprehur në përqindje, janë 100%. Ai është dhe do të jetë trajneri ynë sërish vitin e ardhshëm”.