Marca: Pa Muriqin, Mallorca vështirë se do të mbijetonte në La Liga
Vedat Muriqi dhe Kang In Lee kanë krijuar një partneritet vdekjeprurës te Mallorca. Kështu nis shkrimi i dedikuar sulmuesit të Kombëtares së Kosovës dhe atij të Koresë Jugore nga Marca. Ndër të tjera thuhet se pa këtë dyshe, skuadra vështirë se do të siguronte mbijetesën në ligë.
Vedat Muriqi dhe Kang In Lee kanë krijuar një partneritet vdekjeprurës në Real Mallorca. Suksesi i skuadrës këtë sezon është kryesisht punë e Javier Aguirre, i cili ka dhënë vazhdimësi idesë së tij për lojën, duke marrë maksimumin nga ato pak burime që ka. Por pa futbollistë si aziatiku '19' ose një vrasës që të siguronte një shifër prej rreth 12 golash, siç është rasti me 'Piratin', misioni për të shpëtuar këtë sezon do të ishte shumë i vështirë. Me 40 pikë, synimi për të vazhduar projektin e konsolidimit të klubit në ligë është më shumë se në rrugën e duhur. Dhe pjesërisht falë dyshes së krijuar nga këta dy futbollistë, të cilët që nga dita e parë morën zemrat e tifozëve.
Dyshja është një problem i shtuar për kundërshtarët e Mallorcas. Ata kanë shënuar afër 60% të golave të ekipit të tyre (17). Muriqi, me 12 gola në Ligë, i cili është pika referuese e sulmit që të gjithë rivalët i tremben. Nuhatja e tij e golit e ka bërë atë të hyjë plotësisht në 'top 10' të klubit si një nga sulmuesit më të rëndësishëm në historinë e fundit të skuadrës. Ai tashmë ka tejkaluar figurat historike si Aritz Aduriz, Tomer Hemed apo Pierre Webó, të cilët kishin shënuar 11 gola. Një hap më lart është Walter Pandiani apo Albert Luque, me 14 gola. Tashmë, objektivi i 'Muri' është të arrijë Ante Budimir, me 13 gola, sepse 27 golat e Güizas duket vështirë e arritshme. Me një kontratë të gjatë për të përmbushur, deri në vitin 2027, Muriqi e ka të qartë se dëshiron të bëjë histori në ishull. Dhe duket se e ka marrë seriozisht... sepse iu desh pak më shumë se një vit për t'u bërë idhull. Jo për qëllimet e tij, por për vlerën njerëzore që e karakterizon gjithmonë.
Sa i përket Kang In, ai ka shpërthyer si futbollist. Shifrat e tij, pesë gola dhe pesë asistime, konfirmojnë atë që shumë tifozë të Valencias menduan ditën kur Peter Lim vendosi ta linte të largohej. Ai nuk është më ai premtimi i Valencias që ëndërronte të bëhej një futbollist profesionist. Aguirre e ka kthyer në burrë. Dhe ai është përgjigjur duke vënë magjinë e nevojshme për ta bërë Son Moix (stadiumi i Mallorcas) të kënaqet me talentin e tij të padiskutueshëm. Në vetëm 22 vite në shpinë dhe në vitin e dytë në ishull, ai është bërë një thesar i vërtetë për klubin. E ardhmja e tij duket se do të jetë shumë më e ndritshme, por tani për tani partneriteti i tij me Muriqin e gëzon atë dhe gjithë tifozët e Mallorcës.
