Llapi ka arritur që të marrë një barazim në ndeshjen kthyese ndaj Buducnostit në raundin e parë të Europa Conference League, por që nuk ishte i mjaftueshëm për t’u kualifikuar tutje. Ndeshja në Fadil Vokrri pas 90 minutave përfundoi me rezultatin 2:2, ndërsa rezultati i përgjithshëm 4:2 në të mirë të Buducnostit.

Llapi ishte më kërkuese që nga fillimi i ndeshjes, që ishte edhe e kuptueshme pas disavantazhit që kishte nga ndeshje e parë 2:0.

Rasti i parë serioz në ndeshje i takoi Llapit, kur Rivera goditi mirë nga afërsia në minutën e shtatë të takimit, por portieri i Buducnostit ishte i vëmendshëm.

Edhe pse Llapi po e kërkonte më shumë fitoren, ishte Buducnosti që shënoi golin e parë të takimit në minutën e 23 të takimit me anë të sulmuesit Djukanovic.

Llapi deri te goli i barazimit pati disa raste të mira por që portieri malazez në formë nuk lejoi që topi të kalonte prapa krahëve të tij.

Në minutat shtesë të pjesës së parë, gjyqtari akordoi penallti për Llapin, ku Alef Firmino qetësisht realizoi për rezultatin 1:1, e që ishte edhe epilogu i pjesës së parë.

Edhe në pjesën e dytë ishte i njëjti episod, Llapi e kërkonte fitoren ndërsa Buducnosti realizoi sërish e para.

Në minutën e 64 të takimit ishte Djokovic ai që shënoi golin e dytë për skuadrën mysafire dhe të epërsisë 2:1.

Nuk vonoi shumë, kur pas shtatë minutash Kurtaj i Llapit me një gol fantastik sërish barazoi rezultatin në 2:2.

Në minutat shtesë të takimit, Llapi kishte mundësinë për të kaluar në epërsi për herë të parë por Festim Alidema nuk shënoi nga pika e bardhë, dhe rezultati final i takimit ishte ai i minutës së 70-të, pra 2:2.

Llapi këtu përfundon rrugëtimin në Evropë, dhe i mbetët të punojë fort për sezonin e ri në Superligën e Kosovës.

90+4' Llapi shpërdoron rast të artë nga pika e bardhë. I pasaktë u tregua Festim Alidema.

90' Gjyqtari i ndeshjes ka akorduar 5 minuta shtesë

85' Pavarësisht angazhimit të madh të lojtarëve llapjanë, kjo nuk po u mjafton që ta rikthejnë shpresën për kualifikim. Minutat flasin kundër tyre, pasi fundi i ndeshjes po afron dhe Llapi është shumë pranë që të eliminohet nga rrethi i parë kualifikues në Conference League.

70' Kurtaj me anë të një predhe nga distanca shënoi një gol magjeps. I ndihmuar paksa edhe nga një devijim i kundërshtarit, por gjithsesi, vlen për t'u përmendur paraqitja e tij shumë e mirë prej që hyri në fushë. Tanimë rezultati është baras, 2:2.

67' Batatina ka bërë dy zëvendësime tjera. Në lojë janë inkuadruar Da Silva dhe Alidemaj, kurse nga loja dolën Shabani dhe Progni.

65' Kurtaj provoi të shënojë nga një pozitë e vdekur e fushës, më saktësisht nga vija e këndores, por topi shkoi jashtë shtyllës së dytë pingule.

64' Ekipi malazez ka rikthyer epërsinë në favorin e vet. Në mënyrë pragmatike Djokovic shënoi golin e dytë të tij në ndeshje. Llapi pranë eliminimit.

59' Trajneri llapjan ka bërë zëvendësimin e parë. Nga loja është larguar Maliqi, kurse në vend të tij hyri Kurtaj.

58' Llapi fare pranë iu afrua golit të dytë. Maliqi për pak nuk përfitoi nga një rrëshqitje e portierit malazez.

54' Pas nëntë minutave lojë në pjesë të dytë mund të konstatohet që Llapi ka qenë më dominues. Progni për mrekulli u lirua nga këndi i djathtë, harkoi në zonë, por Maliqi për fare pak nuk arriti ta devijojë topin drejt portës.

46' Ka nisur pjesa e dytë mes Llapit dhe Buducnostit.

Llapjanët duhet t'i shënojnë edhe dy gola tjerë për ta barazuar rezultatin e përgjithshme, që do t'i hapte rrugë kualifikimit.

Ka përfunduar pjesa e parë me rezultat baras, 1:1.

Gjithë pjesa e parë kishte gjallëri në lojë. Llapi në shumicën e kohës kishte iniciativën në lojë, por dinak dhe konkret u tregua edhe Buducnost, duke përfituar nga çdo lëshim i llapjanëve.

Në minutën e 19-të, skuadra e Llapit me këmbëngulte që t'i akordohej një penalti, pasi dyshohet se një lojtar i Buducnostit ka prekur topin me dorë. Përkundër presionit të lojtarëve që i bënë, gjyqtari nuk ndryshoi vendim.
Skuadra malezeze gjeti epërsinë në minutën e 23-të, me sulmuesin Djukanovic. Në minutat në vazhdim Llapi hasi në një kolaps psiqik, duke mos arritur të reagojë. Si pasojë, Buducnost goditi shtyllën, duke iu afruar golit.

Por, tek pas minutës së 37-të, Llapi filloi të besojë te barazimi i rezultatit. Firmino me dy goditje nga distanca shkundi skuadrën.

Kjo orvatje e lojtarëve llapjanë u shpërblye, pasi gjyqtari i ndeshjes në minutën e 45-të akordoi penalti në favor të tyre. Nga pika e bardhë nuk gaboi Firmino, i cili barazoi rezultatin në 1:1.

Tanimë Llapi duhet t'i shënojë edhe dy gola, në mënyrë që ta barazojë rezultatin e përgjithshëm dhe ta rihapë çështjen e kualifikimit.

45+1' Firmino mjeshtërisht shënoi nga pika e bardhë për ta barazuar rezultatin në 1:1.
Stadiumi "Fadil Vokrri" kaloi në delir pas golit të brazilianit.

44' Gjyqtari i ndeshjes ka akorduar penalti për Llapin.

42' Firmino filloi ta shkundë Buducnostin. Ai sërish provoi një goditje nga distanca e afërt. Kësaj radhe goditja e sulmuesit brazilian ishte akoma më dinake dhe fortë, por portieri malazez u shkëput lart në cepin e majtë të portës së tij për ta devijuar mrekullisht topin në këndore.

39' Sulmuesi brazilian i Llapit, Firmino, provoi nga 20 metra distanca të godiste nga pozita qëndrore, por topi përfundoi fare pranë shtyllës së parë pingule të portierit malazez.

35' Deri në këtë periudhë të lojës, të besuarit e Tahir Batatinës nuk po ia dalin assesi që t'i afrohen golit të barazimit, që do t'i hapte rrugë edhe një rikthimi eventual në lojë, për t'i kthyer shpresat për kualifikim të mëtejm.

27' Buducnost vijon të jetë skuadër më e matur në fushë. Vetëm shtylla shpëtoi portën e Llapit nga një gol i radhës i malazezëve.

23' Sulmuesi i ri malazez, Djukanovic, përfitoi më së miri nga një huti e mbrojtjes llapjane, për ta çuar topin brenda kuadratit. Buducnost tani është në epërsi me rezultat 0:1.

19' Skuadra e Llapit me këmbëngulje po kërkon që t'i akordohet një penalti, pasi dyshohet se një lojtar i Buducnostit ka prekur topin me dorë. Përkundër presionit të lojtarëve që i bënë, gjyqtari nuk ndryshoi vendim.

12' Dragojevic ka ftuar stafin mjekësor që të intervenojë për ta asistuar, duke u ankuar në një lëndim. Në fund, ai pas një minuti, u ngrit në këmbë, sa për ta dëshmuar që ishte vetëm një arsyetim për ta vonuar lojën.

7' Llapi ndërtoi një aksion të mirë në fazën sulmuese. Rivera u gjend në zonë të rreptësisë dhe provoi të godiste, por portieri kundërshtar u shfaq i vëmendshëm për ta shmangur rrezikun.

1' Ka nisur ndeshja e kthimit mes Llapit dhe Buducnostit.

Po vonohet fillimi i ndeshjes si pasojë e disa hedhjeve të mjeteve piroteknike. Gjyqtari i ndeshjes i ka ftuar të dy skuadrat për t'u konsultuar.