Liverpooli fiton me përmbysje ndaj LASK, Lukaku shënon në fitoren e Romës kundër Sheriff

Liverpooli dhe Roma kanë shënuar fitore në ndeshjet e tyre të para në kuadër të grupeve të Ligës së Evropës, ndaj skuadrave respektive LASK e Sheriff.

Skuadra e Jurgen Klopp fitoi me përmbysje të rezultatit 3:1 ndaj skuadrës austriake, ndërsa Roma me rezultat 2:1 ndaj Sheriff, ku Lukaku shënoi golin e fitores.

LASK – Liverpool

Liverpooli e nisi më mirë ndeshjen në minutat e para, por vendasit shënuan gol të bukur, për ta mbyllur pjesën e parë në epërsi.

Flecker në minutën e 14-të shënoi një gol të jashtëzakonshëm nga distanca, pas një harkimi të bukur nga këndi prej Horvath.

Sporti / Pamje: LASK në epërsi ndaj Liverpoolit, Flecker shënon gol të jashtëzakonshëm

Në pjesën e dytë, të kuqtë reaguan, duke shënuar tre gola dhe për ta fituar ndeshjen me përmbysje.

Ishte Darwin Nunez që shënoi fillimisht në minutën e 56-të nga penalltia, për të barazuar në 1:1.

Sporti / Pamje: Liverpooli e përmbys rezultatin ndaj LASK me dy gola të shpejtë në pjesën e dytë

Vetëm pak minuta më pas, saktësisht në minutën e 63-të, Ryan Gravenberch bëri një asistim të bukur, Luis Diaz që shënoi nga afërsia për 2:1.

Për rezultatin final u kujdes Mohamed Salah, kur shënoi në minutën e 88-të për 3:1.

Sheriff – Roma

Skuadra e Jose Mourinhos, e ka nisur mirë sezonin e ri të Ligës së Evropës.

Ata fituan në një udhëtim të vështirë te Sheriff me rezultat 2:1.

Ishte Leandro Paredes që shënoi në fundin e pjesës së parë për 1:0, rezultat me të cilin skuadrat shkuan në pushim.

Vendasit arritën ta barazonin rezultatin në pjesën e dytë, kur Tovar shënoi për 1:1 në minutën e 57-të.

Por për fitoren e nënkampionit të Ligës së Evropës, u kujdes Romelu Lukaku, që shënoi golin e parë me Romën në Ligë të Evropës dhe të rezultatit përfundimtar 2:1 në minutën e 65-të.