"Liverpooli do ta mposhtë Man Utd 5:0" - Ish ylli i Reds bën parashikim të guximshëm
Ish-lojtari i Liverpoolit, Jose Enrique, ka thënë se skuadra e Jurgen Klopp do ta dominojë përballjen në Kupën FA kundër Manchester Unitedit, duke parashikuar edhe rezultatin.
Enrique, i cili luajti për Liverpoolin nga viti 2011 në 2016, ka mbështetur ish-skuadrën e tij për të siguruar një fitore 5:0 kundër skuadrës së Erik ten Hag të dielën. Liverpool aktualisht ndodhet në vendin e dytë në tabelën e Premierligës - pasi tashmë siguroi Kupën Carabao në shkurt - ndërsa United është në vendin e gjashtë, me Kupën FA që përfaqëson shansin e tyre të vetëm real për fitim të një trofeu këtë sezon.
Duke folur në podcastin e The Counter Attack, ish-mbrojtësi i Reds tha: "Unë nuk dua që Manchester United të marrë një rezultat pozitiv të dielën. Natyrisht kur isha në Liverpool nuk munda t'i përjetoja të qenurit superior ndaj Manchester United. Ishte më shumë 50/50 kur luaja dhe ndonjëherë United ishte ekipi më i mirë.
"Kjo është ende një lojë e vështirë për Liverpoolin, por unë me të vërtetë mendoj se ata do të fitojnë. Manchester United në fakt po luan më keq në Old Trafford sesa kur luan jashtë shtëpisë - nuk është njësoj si dikur kur luaja unë. Do të doja që Liverpool të merrte një fitore vërtet të madhe këtu – do të shkoj me 5:0 ndaj tyre. Ata po shënojnë kaq shumë gola për momentin dhe sulmi i tyre është po aq i mirë sa ka qenë gjatë gjithë sezonit. Do të doja një rezultat të madh si ai – së pari për Liverpoolin, por edhe për Jurgen Klopp”.
Të dy palët u takuan për herë të parë në sezonin 2023-24 në dhjetor, ku Djajtë e Kuq e mbajtën Liverpoolin në barazim 0:0 në Anfield - një kontrast i fortë me takimin e tyre të mëparshëm, i cili përfundoi në një fitore 7:0 për lojtarët e Klopp në mars 2023.
Pas ndeshjes së FA Kupës, Liverpool do të marrë një pushim të nevojshëm gjatë gjithë periudhës ndërkombëtare. Pas kësaj, Klopp do të shpresojë se mund të mirëpresë një numër lojtarësh kyç të ekipit të parë nga lëndimi, si Trent Alexander-Arnold, Curtis Jones dhe Ryan Gravenberch.
