Radja Nainggolan u shfaq mjaft kritik për fushën e stadiumit "Fadil Vokrri".

"Ishte një ndeshje shumë e vështirë. Të luash këtu nuk ishte e lehtë. Fusha ishte vërtet tejet e keqe. E shëmtuar do të thoja. Ishte vështirë të luaje në këtë fushë. Për neve ishte me rëndësi që të kualifikoheshim, pavarësisht se si do të vinte ai kualifikim", shtoi ai

Për fund ai i uroi fat Dritës, si dhe komentoi rikthimin në Belgjikë.

"Kosova është një vend shumë i vogël. Në fund, ishte e drejtë që kaluam ne. E shoh mirë të ardhmen e Dritës. I uroj Dritës një kampionat të mirë dhe që të mund të stoliset me titullin kampion. Jam 34-vjeç. Mua s'më interesojnë paratë. Po e jetoj ëndrrën, për këtë arsye e kam zgjedhur Antwerpin. Akoma brenda vetes ndihem i ri", përfundoi ai.

Mesfushori kreativ i skuadrës së Dritës, Muharrem Jashari, pas ndeshjes ka falënderuar përkrahësit që nuk u ndalën për 90 minuta dhe gjithashtu për ndeshjen tha se dhanë gjithçka nga vetja. Më tutje ai shtoi se liga në Belgjikë nuk është se dallon shumë me Superligën e Kosovës.

"I falënderoj tifozët që s'qëndruan të heshtur për 90 minuta. Kështu e ka futbolli. Jo veç unë, por të gjithë bashkëlojtarët dhanë gjithçka prej vetes. Liga e Belgjikës me ligën tonë nuk është se dallon shumë. Jam i gatshëm të luaj në Evropë.

Sa i përket atmosferës së krijuar nga 'Intelektualët', kam qenë tejet i emocionuar gjatë 90 minutave të ndeshjes".

Pas ndeshjes kanë folur edhe dy lojtarët e Dritës, Besnik Krasniqi dhe kapiteni Ardian Limani, të cilët kanë falënderuar tifozët për përkrahjen masive si dhe janë shprehur se sot kanë luajtur futboll cilësore duke dëshmuar nivelin e lartë të Superligës së Kosovës.

"Të luash ndeshje si kjo është e veçantë. I falënderoj të gjithë që erdhën për të na përkrahur. Sa i përket paraqitjes, nuk jam i befasuar aspak, sepse në Superligë gjithmonë ka pasur lojtarë të mirë. Sot, treguam që nuk ishim shumë inferiorë ndaj Antwerp", tha Krasniqi.

Limani, kapiteni i skuadrës, gjithashtu shtoi se sot kanë qenë më të rrezikshëm se kundërshtarët për nga rastet e krijuara.

"Sot, ishim më të rrezikshëm se kundërshtari sa i përket rasteve të krijuara. Po të shënonim të parët, ndeshja do të shkonte ndryshe. I falënderoj tifozët që dhanë gjithçka nga vetja për të na përkrahur. U jemi borxh atyre. Një ditë do të kualifikohemi deri në fund, në grupet."

Trajneri i skuadrës së Dritës, Ardian Nuhiu, ka folur pas ndeshjes ku ka falënderuar futbollistët për paraqitjen fantastike që kanë pasur në kualifikimet për gara evropiane, për fund i falënderojë dhe tifozët për përkrahjen e madhe.

"Realisht dua t'i falënderoj futbollistët. Na kanë bërë krenarë të gjithëve. Dua t'i falënderoj për çdo emocion që na kanë sjellë. Në të dy ndeshjet besoj që kemi bërë paraqitje të mira. Me kundërshtarë të tillë duhet të ndëshkosh në mundësinë e parë që të jepet, pasi dimë që janë një skuadër që është ndërtuar nga dy legjenda siç janë drejtori sportiv dhe trajneri.

Tani duhet të rikthehemi aty ku prapë do të na dërgojë në Evropë, pra në Superligë. Edhe kampionati ynë po përmirësohet, duke treguar rezultate të mira në arenë evropiane.

Dua t'i falënderoj të gjithë tifozët për mbështetjen. Edhe lojtarët bënë më të mirën, por nuk arritën t'i realizojnë rastet e krijuara"

Ka përfunduar ndeshja në "Fadil Vokrri" me rezultat 0:2.

Drita dha gjithçka, por kjo nuk mjaftoi që të kualifikohet në rrethin e tretë kualifikues të Ligës së Konferencës. Për mysafirët golin e parë e shënoi mbrojtësi i krahut të majtë me origjinë nga Kosova, Laurit Krasniqi, i cili shënoi me kokë në minutën e 52-të.

Ndërkaq, krejt në fund, pasi e gjithë skuadra e Dritës ishte vërsulur në sulm, përfshirë edhe vetë portierin Maloku, me portën thuajse të zbrazur shënoi sulmuesi anësor Balikwisha.

90 + 7' Me portën e zbrazur, Balikwisha shënoi golin e dytë në ndeshje për Antwerp, duke e eliminuar çdo shpresë të Dritës.

90 + 6' Mbrojtësi i inkuadruar në fushë para 27 minutave, Verstraete, është ndëshkuar me karton të verdhë.

90 + 2' Van Bommel ka bërë edhe dy zëvendësime të tjera. Nga loja doli golashënuesi i vetëm në këtë ndeshje, Laurit Krasniqi, duke i lënë hapësirë Almeidas. Ndërkaq, nga loja doli edhe Gerkens, për t'u inkuadruar në lojë Vines.

90 + 1' Kapiteni i Dritës, Limani, është ndëshkuar me karton të verdhë, pasi protestoi për zhagitjet në lojë që po i shkakton Antwerp.

90' Gjyqtari i ndeshjes ka akorduar shtatë minuta shtesë.

87' Drita ka bërë edhe dy zëvendësime tjera, për t'i kompletuar të gjitha zëvendësimet e mundshme, gjithsejt pesë sosh. Nga loja dolën Krasniqi dhe Baftiu, ndërkaq në lojë hyrën Islami dhe Tahiri.

84' Van Bommeò ka bërë zëvendësimin e tretë në fushë. Nga loja doli asistuesi i golit të vetëm në ndeshje, Benson. Ndërkaq, në fushë hyri Miyoshi.

81' Muharrem Jashari është futbollisti i dytë i Dritës që është ndëshkuar me karton të verdhë, pas një zhagitjeje të ashpër.

77' Drita ka bërë zëvendësimin e radhës. Arbnor Muja doli nga loja, për t'i lënë vend Almir Kryeziut.

Duhet thënë se sulmuesi këmbëshpejtë mitrovicas është neutralizuar në plotni nga kundërshtarët, duke mos arritur të shfaqet i rrezikshëm sikurse në ndeshjet paraprake.

69' Van Bommel ka vendosur t'i bëjë dy zëvendësime. Nga loja dolën Janssen dhe Nainggolan, kurse në fushë u inkuadruan Frey dhe Verstraete.

68' Në tre minutat e fundit, Drita ka treguar një mentalitet sulmues në fushë, duke bërë presion të madh drejt mbrojtjes kundërshtare. Kjo dha frytet e veta, pasi u ndëshkua me karton të verdhë edhe Janssen.

65' Tek pas diç më shumë se një orë lojë ka ardhur edhe kartoni i parë për mysafirët. Me karton të verdhë u ndëshkua Gerkens.

63' Drita ka bërë dy zëvendësimet e parta. Nga loja janë larguar Broja dhe Ajzeraj, për t'u dhënë hapësirë Namanit dhe Selmanit.

63' Me një fintë të mrekullueshme, Benson zhagiti Brojën, duke iu afruar portës së Dritës. Por, goditja e tij u ndal nga Maloku.

61' Benson vijon të jetë lojtari më i dalluar në fushë. Ai me të jashtmen e këmbës së tij të djathtë u mundua ta befasojë Malokun duke goditur nga gjysmë distanca, por Maloku u tregua syhapur, duke kapur topin.

52' Laurit Krasniqi ka shënuar me kokë, duke befasuar kësisoj mbrojtjen e Dritës. Aksioni nuk po premtonte shumë, por harkimi i Benson doli të ishte shumë i papërshtatshëm. Në fund, një devijim i Krasniqit, me prejardhje nga Kosova, ishte vendimtar për t'i çuar shifrat në 0:1

Ai fare nuk ngurroi që të festojë, pasi shënoi golin.

51' Antwerp e ka nisur në sulm pjesën e dytë. Mbizotërimi në qarkullim të topit është evident, edhe pse akoma nuk ka prodhuar ndonjë aksion të rrjedhshëm, i cili do ta rrezikonte seriozisht portën e Dritës.

46' Ka nisur pjesa e dytë e ndeshjes mes Dritës dhe Antwerp. Pjesëloja e parë u mbyll me rezultat 0:0. Gjithçka mbetet e hapur, pasi edhe ndeshja e parë ka përfunduar me po të njëjtin rezultat.

Mbi dhjetë mijë tifozë janë të pranishëm në shkallët e stadiumit "Fadil Vokrri", për ta parë nga afër ndeshjen e kthimit të rrethit të dytë kualifikues në Ligën e Konferencës, mes Dritës dhe Antwerp. Pjesa e parë u mbyll me rezultat 0:0.

Mirëpo, ishin tifozët e udhëhequr nga "Intelektualët" ata që po i japin dekor kësaj ndeshjeje, me një përkrahje të jashtëzakonshme nga shkallët e stadiumit.

Gazeta Nacionale përmes fotografit të saj zyrtar, Valdrin Xhemaj, ju sjell disa pamje.

Ka përfunduar pjesa e parë me rezultat 0:0 mes Dritës dhe Antwerp. Gjilanasit treguan një paraqitje të barabartë në fushë. Ishte skuadra e Ardian Nuhiut ajo që kishte rastin më të mirë në ndeshje, kur Simonovski në minutën e 15-të u gjend përballë portierit kundërshtar, por vonoi tejet shumë goditjen dhe në fund topi përfundoi në këndore.

Në pjesën e mbetur të ndeshjes loja u karakterizua me duele të ashpra, ku lojtarët e Dritës shfaqen një përgatitje fizike për t'u admiruar.

Përkundër agresivitetit në fushë, vetëm një karton u nda në 45 minutat e parë. Në minutën e 36-të gjyqtari i ndeshjes e ndëshkoi me karton të verdhë mbrojtësin e krahut të djathtë të Dritës, Besnik Krasniqi.

45' Gjyqtari i ndeshjes ka akorduar tre minuta shtesë.

33' Antwerp pas një faze të ndeshjes ku ishte i pavërejtshëm, u kthye të jetë i rrezikshëm. Pas një aksioni që nuk premtonte shumë, ishin një mori devijimesh që bënë që Jansen të godiste me kokë, por topi përfundoi në duart e Malokut.

27' Dhjetëra tifozë kanë hyrë në sektorin e jugut të stadiumit "Fadil Vokrri", anipse i njëjti në kushte normale ishte paraparë që të ishte i mbyllur, meqë i takonte tifozërisë mysafire.

Gjithsesi, interesimi i jashtëzakonshëm për të qenë në tribunat e stadiumi ka bërë të veten, duke shtyrë qindra tifozë të Dritës të gjejnë çdo hapësirë të mundshme për të hyrë në stadium.

26' Drita po luan si skuadër e barabartë, pa treguar inferioritet. Madje, deri më tani ishte skuadra gjilanase që kishte rastin më të mirë në lojë, me Simonovskin në minutën e 15-të.

15' Pas një pasimi tejet të bukur nga Muharrem Jashari, sulmuesi Simonovski u gjend i vetëm para portës kundërshtare, por dështoi që ta fusë topin në rrjetë. Njëherazi, ky ishte rasti më i mirë në ndeshje.

9' Benson vazhdon të jetë lojtari më i rrezikshëm për Antwerp. I tillë u dëshmua edhe kësaj radhe, kur goditi pa menduar shumë në brendi të zonës. Goditjen e tij e ndali për mrekulli Maloku.

8' Pas dy minutave të para, Antwerp ka marrë kontrollin e lojës, duke e qarkulluar më shumë topin, për ta vendosur kështu edhe një mbizotërim në fushë. Sido që të jetë, akoma skuadra e Ardian Nuhiut nuk ka hasur në ndonjë rrezik të theksuar, në përjashtim të një goditjeje të papërshtatshme nga distanca të Nainggolan, të cilën e devijoi Maloku.

1' Drita që në fillim të ndeshjes tregoi mentalitet sulmues. Shumë shpejt gjilanasit fituan këndoren e parë. Rrjedha e kësaj ndërprerje ishte e tillë, sa topi qarkulloi shpesh në zonë, duke bërë që të kërcënohej porta e mysafirëve. Baftiu goditi nga gjysmë distanca në fund, por topi përfundoi lart mbi portë.

1' Me një minutë vonesë ka nisur ndeshja e kthimit mes Dritës dhe Antwerp, e vlefshme për rrethin e dytë kualifikues të Ligës së Konferencës. Topin e parë e nisën mysafirët.

Kujtojmë se ndeshja e parë ka përfunduar me rezultat 0:0.

Për mikrofonin e transmetuesit zyrtar të kësaj ndeshje, SuperSport, drejtori i Dritës, Valon Zymberi, ka folur pak para se të nisë ndeshja.

"Sigurisht që kjo s'është hera e parë që kemi dëshmuar se mund të përballemi me nivel të lartë të ekipeve. Shpresoj që me ndihmën e 'Intelektualëve' dhe stadiumin e mbushur, mund ta arrijmë një kualifikim. Tani duhet të presim të kemi ndonjë risi sa i përket transferimeve, pas këtyre rezultateve. 10,500 bileta i kemi shitur nga ajo që di unë", theksoi ai.

Të dy skuadrat, Drita dhe Antwerp, kanë përfunduar fazën e nxemjes ose të ushtrimeve të fundit para fillimit të ndeshjes.

Fotografi i Gazetës Nacionale, Valdrin Xhemaj, sjell këto fotografi nga stadiumi "Fadil Vokrri", me skuadrat që shihen duke u bërë gati për ta nisur ndeshjen.

Burimet afër Dritës në kushte jo-formale i kanë thënë Gazetës Nacionale se stadiumi do të jetë i stërmbushur, pasi të gjitha biletat tashmë janë shitur.

Paraqitja shumë e mirë që bënë gjilanasit në ndeshjen e parë, bëri që jo veç "Intelektualët", por edhe një mori futbolldashësish të interesoheshin për të siguruar një biletë për ditën e sotme.

Antwerp ka bërë disa ndryshime në formacion për dallim nga ndeshja e parë. Kësaj radhe titullarë do të luajnë Pacho në qendër të mbrojtjes dhe Balikwisha në sulm.

Trajneri i Dritës, Ardian Nuhiu, ka vendosur që të mos bëjë ndryshime në formacion, duke zgjedhur formacionin e njëjtë sikur në ndeshjen e parë në Belgjikë, që përfundoi me rezultat 0:0.

Ky është formacioni i sotëm i Dritës: