Alain Giresse nuk është më te kombëtarja e Kosovës, FFK paralajmëron reforma "të mëtejme"
Federata e Futbollit të Kosovës (FFK) ka njoftuar opinionin se ka shkëputur bashkëpunimin me marrëveshje të dyanshme me trajnerin Alain Giresse.
“Deri te ky vendim, vjen pas humbjes në ndeshjen e fundit kundër Bjellorusisë (1:2)” – thuhet në komunikatën e lëshuar nga FFK.
FFK e ka falenderuar Giresse për angazhimin dhe punën e bërë.
Në anën tjetër, FK ka paralajmëruar edhe (sic) “reforma të mëtejshme në ekipin kombëtar” por pa treguar specifikisht se çka bëhej fjalë.
Kujtojmë se Giresse ishte emëruar trajner i kombëtares së Kosovës në shkurt të vitit 2022 dhe kishte udhëhequr në 14 ndeshje, duke arritur vetëm katër fitore.
Në të kaluarën, ai kishte pasur karrierë relativisht të suksesshme në Francë me ekipin e Toulouse, ndërkohë që e kishte menaxhuar shkurtimisht edhe ekipin e famshëm Paris Saint-Germain. Sa i përket ekipeve kombëtare, ai kishte menaxhuar me Gjeorgjinë, Gabonin, Malin, Senegalin etj.
Giresse kishte bërë emër të madh si futbollist, duke u shpallur kampion i Evropës me Francën në vitin 1984 bashkë me Michel Platinin, një mik tjetër i futbollit të Kosovës.
Po ashtu, Giresse njihet si legjendë e ekipit Bordeaux ku kishte luajtur për 16 vjet, duke u shpallur dy herë kampion i Francës.
Sa i përket arritjeve si trajner, ai kishte fituar Trophee des Champions me Paris Saint Germain në vitin 1998, një trofe në Marok me ekipin FAR Rabat, dhe vendin e tretë në Kupën e Afrikës me Malin.
Pas humbjes ndaj Bjellorusisë, gjasat e Kosovës për t'u kualifikuar në kampionatin evropian janë zbehur ndjeshëm. Nga katër ndeshjet e para, kombëtarja e Kosovës i ka fituar vetëm tri nga dymbëdhjetë pikët e mundshme.
Kosova është në grup me Zvicrën, Rumaninë, Bjellorusinë, Izraelin dhe Andorrën.
Për dështimin e Kosovës kujtojmë se është fajësuar edhe vetë FFK-ja nga analistë të ndryshëm.
