“Kjo s’është ditë hidhërimi, por ditë gëzimi” - Marcelo largohet nga Real Madridi si legjendë
Pesëmbëdhjetë vite pasi erdhi në Real Madrid me plan për ta pasuar Roberto Carlosin, Marcelo do të largohet nga gjiganti evropian si lojtari më i dekoruar në historinë e klubit.
Muajin e kaluar mbrojtësi 34-vjeçar e kaloi Paco Genton si lojtari me më së shumti trofe të fituar me Real Madridin, pasi e fitoi La Ligën për herë të gjashtë dhe me triumfin e së shtunës në Ligën e Kampionëve kundër Liverpoolit, ai tani ka 25 trofe në përgjithësi në karrierë për Los Blancos.
“Është një emocion i jashtëzakonshëm, sepse është ndeshja ime e fundit në Real Madrid. Të largohem me një trofe të Ligës së Kampionëve është gëzim i madh. Nuk është ditë pikëllimi”, tha Marcelo pas fitores 1:0 në Paris.
Megjithëse nuk u paraqit në finale, Marcelo ishte i zëshëm nga stoli derisa shokët e vet po e fitonin kupën e 14-të evropiane për Realin dhe ai e çoi lart trofeun, para se t’i printe festes në Plaza de Cibeles në Madrid të dielën.
“Ky është një çast i mrekullueshëm në jetën time. Këtu po e mbyll një cikël, në klubin më të mirë në botë”, shtoi Marcelo, i cili tha se kishte ëndërruar ta çonte lart këtë trofe pasi e kishte zëvendësuar Sergio Ramosin si kapiten këtë sezon.
“Sot nuk është një ditë trishtimi, por një ditë gëzimi sepse ne përsëri e fituam kampionatin më të mirë në botë. Unë jam shumë krenar me veten dhe familja ime me mua. Ne i kemi përjetuar shumë net magjike së bashku”.
Ai shtoi: “Po ju them një gjë, e ardhmja e Madridit është shumë e mirë me lojtarët e rinj. Hala Marid!”
Ish-presidenti Roman Calderon e kishte përshkruar Marcelon si “një xhevahir që gjysma e Evropës e dëshiron” kur Real Madridi e bindi 19-vjeçarin t’i bashkohej klubit nga Fluminese në janar 2007.
Carlosi kishte qenë zgjedhja e parë e Realit për një dekadë dhe ishte dikush të cilin Marcelo e konsideronte idhull. “Për mua ai ishte zot. Ta vija në ekipin ku ishte ai dhe të luaja në pozitën e njëjtë, nuk mund ta besoja”, kujton Marcelo.
Carlosi u largua drejt Fenerbahces në të njëjtën verë dhe tani thotë se Marcelo është bërë futbollist më i mirë se seç ka qenë ai.
Vërtet, Marceli i bëri më shumë se 500 paraqitje për Realin, duke e fituar jo vetëm Ligën e Kampionëve dhe La Ligën, por edhe Kupën e Botës për Klube, Superkupën Evropiane, Superkupën Spanjolle dhe Kupën e Mbretit.
Trajneri i Realit Carlo Ancelotti e ka përshkruar Marcelon si legjendë dhe mik.
