“Ka qenë gjithmonë i vlerësuar tek ne”, Guardiola mbështet Cancelon

Trajneri i Manchester Cityt, Pep Guardiola ka mbrojtur mbrojtësin Joao Cancelo që u fishkëllye nga tifozët anglezë gjatë ndeshjes së Ligës të Kampionëve.

Portugezi hyri si inkuadrues te Bayern Munich në derbin ndaj “Qytetarëve”, por tifozët e Man Cityt menjëherë nisën ta fishkëllenin.

Tekniku spanjoll e ka mbështetur portugezin duke deklaruar se gjithnjë ka qenë i vlerësuar në “Etihad Stadium”, por u fishkëllye shkaku që kaloi te gjiganti gjerman.

“Joao ka qenë gjithmonë i vlerësuar te City. Kjo ndodhi sepse ai atë natë ishte kundërshtari ynë. Jam i sigurt se ata e vlerësojnë gjithashtu. Joao ka qenë dhe ndoshta do të jetë lojtarë i rëndësishëm për ne”, tha Guardiola në konferencë për media, duke lënë të hapur mundësinë që futbollisti të rikthehet në verë.

E ardhmja e portugezit në Bayern Munich duket e pasigurt pasi lojtari ka një klauzolë në marrëveshjen e tij të huazimit që mund të bëjë një marrëveshje të përhershme prej 70 milionë eurosh, por klubi gjerman nuk është i prirur që të bëjë biznes me atë çmim.

Barcelona gjithashtu ka shfaqur interesim për nënshkrimin e lojtarit sezonin e ardhshëm. Cancelo mund të jetë pjesë e formacionit të parë në ndeshjen e Bayern Munich të shtunën në përballjen ndaj Hoffenheim në kuadër të Bundesligës./Orselina Lazraj/