Junior Messias bën heroin, AC Milan fiton me mund ndaj Monzas
AC Milan ka shënuar fitore minimale në udhëtim te Monza, në kuadër të xhiros së 23-të në Serie A.
"Rossonerët" kishin rastet më të mira në ndeshje, duke fituar në fund me rezultat 0:1.
Mysafirët e nisën më mirë duke rrezikuar me anë të Rafael Leaos dhe Brahim Diazit, por goditjet e të dyve u devijuan.
Ishte mesfushori sulmues Junior Messias që u gjend në vendin e duhur dhe me një goditje të fuqishme kaloi Milanin në epërsi pas 31 minutave lojë - VIDEO.
Ndeshja tutje ishte shumë e baraspeshuar, me "Rossonerët" që vazhduan të provojnë të gjejnë golin e dytë, por nuk ia dolën.
Theo Henandez kishte dy mundësi të mirë shënimi pas disa aksioneve, por goditjet e francezit përfunduan jashtë kuadratit.
Rasti i vetëm që vlen të ceket te Monza ndoshta ishte i Patrick Ciurria, i cili tentoi ta befasonte portierin mysafir, mirëpo nuk ia doli.
Kështu, AC Milan arkëton pikët e plota dhe ngritët në pozitën e tretë me 44 pikë, derisa Monza vazhdon të qëndrojë në pozitën e 10-të me 29 sosh.
Në xhiron e radhës, Milan do të përballet me Atalantan, derisa Monza do të takohet me Salernitanan.
