Ish-shefi i FIFA-s Sepp Blatter e pranon: Kupa e Botës në Katar ishte gabim
Sepp Blatter, ish-presidenti i FIFA-s kur Katari e fitoi të drejtën për organizimin e Kupës së Botës 2022 në vitin 2010, ka thënë se vendimi për ta zgjedhur vendin e Lindjes së Mesme si nikoqir të Botërorit ishte gabim.
Vendimi për t’ia dhënë Katarit të drejtën për organizimin e Botërorit në vitin 2010 ishte pritur me shumë polemika, pasi vendi konservator mysliman akuzohej për dhënie të ryshfetit për ta siguruar të drejtën e organizimit të këtij turneu, derisa koha e zhvillimit të tij u ndryshuar nga vera në dimër për shkak të temperaturave të lara në verë.
Blatter, i cili e udhëhoqi FIFA-n për 17 vite, është akuzuar për korrupsion po ashtu gjatë udhëheqësisë së tij si president. Ai u shpallë i pafajshëm për mashtrim nga një gjykatë zvicerane në qershor. Prokurorët janë ankuar ndaj vendimit.
“Zgjedhja e Katarit për organizimin e Kupës së Botës ishte gabim dhe unë e pranoj përgjegjësinë time si president i FIFA-s në atë kohë”, tha Blatter për gazetën zvicerane Tages Anzeiger.
“Është vend shumë i vogël. Futbolli dhe Kupa e Botës janë shumë të mëdha për të”, tha Blatter për Katarin, i cili është vendi i parë i Lindjes së Mesme që do të jetë nikoqir i këtij turneu.
Ai shtoi: “Që prej atëherë u morën parasysh të drejtat e njeriut dhe konsideratat sociale”.
Blatter tha se do ta shikojë turneun, i cili nis më 20 nëntor, nga shtëpia e vet në Zurich.
"Në atë kohë, ne në fakt u pajtuan në Komitetin Ekzekutiv që Rusia ta organizojë Kupën e Botës 2018 dhe SHBA-ja Kupën e Botës 2022. Kjo do të kishte qenë një shenjë paqeje nëse dy kundërshtarë të moçëm politikë do të kishin qenë nikoqirë të Kupës së Botës njëri pas tjetrit”, theksoi ai.
