Interi dhe Dimarco refuzojnë interesimin e Manchester Unitedit
Sipas Tuttosport, Interi dhe Federico Dimarco kanë refuzuar një interesim të Manchester Unitedit dhe zikaltrit tani janë të gatshëm t'i ofrojnë mbrojtësit një kontratë të re.
Mbrojtësi i Interit dhe Italisë, Dimarco nuk është i interesuar për një lëvizje te Manchester United dhe thuhet se ka refuzuar interesimin nga Old Trafford javët e fundit.
Sipas Tuttosport, Djajtë e Kuq janë në kërkim të një mbrojtësi të ri të majtë në afatin kalimtar të dimrit dhe Dimarco ishte ndër emrat kryesorë në listën e tyre të blerjeve.
Megjithatë, si Interi ashtu edhe ylli i tyre nuk janë të interesuar për të negociuar një transferim në janar, kështu që Djajtë e Kuq do të duhet të kërkojnë diku tjetër për përforcime në krahun e majtë.
Tuttosport shton se edhe Arsenali kishte bërë një përpjekje joformale për të nënshkruar me Dimarco në verë, por Topçinjtë morën të njëjtën përgjigje nga Interi dhe ylli i tyre.
Dimarco nuk është vetëm një produkt i akademisë së Interit, por është gjithashtu një tifoz i flaktë i zikaltërve, kështu që ai as që po mendon të largohet nga klubi i tij i preferuar.
Kontrata e 27-vjeçarit në Stadio Meazza skadon në qershor 2027, por sipas Tuttosport, Interi tani është gati të hapë bisedimet për të zgjatur marrëveshjen deri në 2028 ose 2029.
