Harry Kane shënon het-trik, Bayern Munich pa mëshirë ndaj Mainzit
Pas një periudhe jo shumë të mirë, duke se Bayern Munich është kthyer furishëm në garën për titull, pasi shënoi fitore me rezultat të thellë 8:1 ndaj Mainzit, me Harry Kane që kompletoi het-trikun.
Skuadra e Thomas Tuchel mori një fitore të rëndësishme në Ligë të Kampionëve, duke u kthyer nga disavantazhi, për t'u kualifikuar në çerekfinale, që siç duket ishte pika e kthesës e klubit.
Bavarezët në Allianz Stadium u treguan fare pa mëshirë ndaj një skuadre që rrezikon seriozisht rënien nga elita gjermane e futbollit, me Kane që shkëlqeu sërish.
Sulmuesi anglez e hapi serinë e golave, kur shënoi për 1:0 në minutën e 13-të i asistuar nga Musiala.
Vetëm shtatë minuta më pas, Leon Goretzka dyfishoi epërsinë.
Mainz arriti të ngushtonte rezultatin në 2:1 me anë të Nadiem Amirit, por ky doli të ishte goli i vetëm i tyre në këtë takim.
Bayern Munich deri në fund të pjesë së parë shënoi edhe një herë, kësaj radhe Goretzka ishte në rolin e asistuesit, në golin e shënuar në minutat shtesë për 3:1.
Kampioni në fuqi i Gjermanisë e filloi furishëm pjesën e dytë, ku në minutën e 47-të ishte Thomas Muller që shënoi për 4:1, me Musialën që bëri asistin e dytë në këtë ndeshje.
Musiala e gjeti vetën në listën e realizatorëve për rezultatin 5:1 në minutën e 61-të, me Kane kësaj radhe që asistoi.
Sergey Gnabry i inkuadruar në minutën e 62-të në lojë, bëri ndikim të menjëhershëm dhe shënoi për 6:1 katër minuta pasi hyri në fushë.
Ndërsa për rezultatin 7:1, ishte Harry Kane që kompletoi het-trikun e tij, që tashmë shkon në 30 numri i golave të shënuar nga ai në Bundesliga.
Goretzka shënoi të dytin personal dhe për rezultatin përfundimtar 8:1 në minutat shtesë.
Bayern Munich me këtë fitore gjendet në vendin e dytë me shtatë pikë më pak se Bayer Leverkusen, skuadër kjo që nuk ka asnjë humbje këtë sezon dhe ka një ndeshje më pak të zhvilluar.
