Guardiola pritet të nënshkruajë kontratë të re me Manchester Cityn
Pep Guardiola është pajtuar për një marrëveshje të re, për të vazhduar qëndrimin e tij te Manchester City edhe për një vit tjetër, siç konfirmojnë burimet e ESPN-së.
Marrëveshja aktuale e Guardiolës zgjat deri në fund të sezonit dhe 53-vjeçari ende nuk i ka zbuluar planet e tij.
Por pas bisedave pozitive mes Guardiolës dhe drejtuesve të klubit, ish-trajneri i Barcelonës do të marrë drejtimin në stadiumin Etihad për sezonin e 10-të me radhë.
Guardiola është tashmë trajneri më i suksesshëm në historinë e klubit, pasi ka fituar 15 trofe të mëdhenj – përfshirë gjashtë tituj të Premierligës – që kur erdhi nga Bayern Munich në 2016.
Burime me njohuri për situatën kanë thënë më parë për ESPN se Guardiola pritej të vendoste nëse do të nënshkruante një zgjatje midis pushimeve ndërkombëtare të nëntorit dhe fillimit të vitit të ri.
Dy zgjatjet e tij të fundit - në 2020 dhe 2022 - u nënshkruan në nëntor për të shmangur spekulimet që do të ndikonin në gjysmën e dytë të sezonit të skuadrës.
City ka humbur katër ndeshjet e fundit në të gjitha garat, por ende qëndron në vendin e dytë në tabelën e Premierligës, pesë pikë prapa liderit Liverpool.
Ata gjithashtu do të marrin pjesë në Kupën e Botës për Klube të zgjeruar nga FIFA, e cila fillon në Shtetet e Bashkuara në qershor.
Zgjatja e qëndrimit të Guardiola do të jetë një nxitje për Cityn, i cili do të humbasë drejtorin e futbollit Txiki Begiristain në fund të sezonit. Begiristain, një mik i ngushtë dhe aleat i Guardiolës, do të zëvendësohet nga Hugo Viana, i cili do të vijë nga Sporting CP.
