Guardiola përballet me një vendim të vështirë para ndeshjes me Real Madridin
Trajneri i Manchester Cityt, Pep Guardiola, përballet me një dilemë të vështirë në përzgjedhjen e skuadrës për fazën eliminatore të Ligës së Kampionëve, pasi do t’i duhet të përjashtojë një nga blerjet e reja të janarit para afatit të së enjtes.
City, mes një ecurie të luhatshme të formës, shpenzoi 210 milionë euro (219 milionë dollarë) muajin e kaluar për të transferuar sulmuesin Omar Marmoush, mesfushorin Nico González dhe mbrojtësit Abdukodir Khusanov e Vitor Reis.
Sipas rregullave të UEFA-s, klubet duhet të dorëzojnë listën e skuadrës me 25 lojtarë për fazat e eliminimit deri të enjten në orën 23:59. Megjithatë, secili klub mund të bëjë vetëm tre ndryshime nga lista e fazës së grupeve, çka do të thotë se City duhet të lërë jashtë të paktën një nga katër afrimet e reja.
City do të përballet me Real Madridin në fazën e play-offit, me ndeshjen e parë të planifikuar më 11 shkurt në Etihad dhe takimin e kthimit më 19 shkurt në "Santiago Bernabéu".
Kjo do të jetë përballja e katërt radhazi mes Cityt dhe Realit në fazën eliminatore të Ligës së Kampionëve. Sezonin e kaluar, të dyja ekipet barazuan në të dyja takimet, përpara se madrilenët të kalonin më tej pas fitores me penallti dhe të vazhdonin rrugën drejt titullit, duke mundur Borussia Dortmundin në finale. Një vit më parë, City triumfoi me rezultatin e përgjithshëm 5:1 në gjysmëfinale përpara se të mposhtte Interin në finale, duke siguruar tripletën historike.
