Granit Xhaka: M’u desh të shënoja sot, i premtova gruas për ditëlindjen e 30-të
Mesfushori shqiptar që përfaqëson Zvicrën, Granit Xhaka, ishte sërish protagonist në fitoren e Arsenalit. Kësaj radhe shënoi golin e fundit të takimit për 4:0 ndaj Leeds United, të cilin ai me anë të një postimi tha se duhej të shënonte, sepse i kishte premtuar gruas së tij për ditëlindje.
Arsenali shënoi fitoren e 23-të sezonale, me dy golat e Gabriel Jesus dhe dy gola të tjerë të shënuar nga White e Xhaka.
Me të përfunduar ndeshja, Graniti postoi foto në rrjetin social në Instagram, ku e shoqëroi me një dedikim.
“I kam premtuar gruas sime një gol për ditëlindjen e 30-të të saj, kështu që më duhej të shënoja sot! Urime ditëlindja.”
Ky sezon për Xhakën si në nivel personal ashtu edhe me klub, ka qenë ndoshta më i miri, pasi deri më tani në 29 paraqitje, ka shënuar pesë gola dhe ka asistuar në po aq, duke ndihmuar Arsenalin drejt titullit të parë në Premierligë që nga viti 2004.
