FIFA i vendos krah për krah Granit Xhakën dhe Dusan Tadicin e Serbisë
FIFA i ka vendosur Granit Xhakën dhe Dusan Tadicin krah për krah në një fotografi të ilustruar me kapitenët e të gjitha kombëtareve pjesëmarrëse në Kupën e Botës 2022, që do të mbahet në Katar në fund të këtij viti.
Në fotografinë e shtëpisë së futbollit botëror, Xhaka, kapiteni i Zvicrës, shihet duke e ledhatuar me dorë në kraharor Tadicin, kapitenin e Serbisë.
Who are you most looking forward to watching at the World Cup this year? 💭 #Qatar2022 is calling! 🏆 pic.twitter.com/xg68Bz4ipH
— FIFA World Cup (@FIFAWorldCup) June 14, 2022
Zvicra dhe Serbia janë pjesë e Grupit G në Kupën e Botës dhe do të përballen njëra me tjetrën për herë të parë që prej ndeshjes që shkaktoi shumë polemika në Kupën e Botës 2018 në Rusi.
Kjo do të jetë hera e dytë që Zvicra dhe Serbia do të përballen mes vete. Pjesë e Grupit G janë edhe Brazili e Kameruni.
Herën e parë dhe të vetme kur Zvicra u përballë me Serbinë, ndeshja gjalli shumë polemika, pasi dyshja shqiptare Granit Xhaka dhe Xherdan Shaqiri festuan me simbole kombëtare shqiptare, duke nxitur tërbim në mesin e serbëve.
Xhaka dhe Shaqiri festuan duke e bërë shqiponjën dykrenore, që është simbol në flamurin kombëtar shqiptar, pasi shënuan për t’i ndihmuar Zvicrës ta mposhtë Serbinë 2:1 në një ndeshje vendimtare në fazën grupore të Botërorit Rusia 2018.
Festimi i tyre ishte cilësuar si nacionalist dhe kishte shkaktuar polemika të shumta, gjë që e bëri FIFA-n t’i dënojë me gjobë të dy futbollistët me prejardhje nga Kosova.
Më vonë, Xhaka kërkoi falje për mënyrën se si festoi atë kohë dhe u zotua se nuk do ta përsërisë kurrë një gjë të tillë.
Pas katër viteve kanë ndryshuar shumë gjëra dhe Xhaka është bërë kapiten i kombëtares së Zvicrës. Ai dhe Shaqiri pritet ta bartin barrën kryesore mbi supe për Zvicrën edhe në Botërorin që mbahet nëntor dhe dhjetor.
