FA dënon trajnerin e Liverpoolit me pezullim dhe gjobë të rëndë
Trajneri i Liverpoolit, Arne Slot, dhe ndihmësi i tij, Sipke Hulshoff, janë dënuar me nga dy ndeshje pezullim dhe janë gjobitur nga Federata Angleze e Futbollit (FA) për "sjellje të pahijshme" pas përfundimit të barazimit me Everton në derbin e Merseyside.
Slot u pa duke debatuar ashpër me gjyqtarin Michael Oliver pas barazimit 2:2 me Everton dy javë më parë. Ashtu si ndihmësi i tij, trajneri kryesor i Liverpoolit u akuzua për "sjellje të pahijshme dhe/ose përdorim të fjalëve dhe/ose sjelljeve fyese" ndaj gjyqtarit.
Pezullimi me dy ndeshje fillon nga sfida kundër Newcastle United të mërkurën dhe përfundon pas përballjes me Southampton më 8 mars. Përveç pezullimit, Slot u gjobit me 70,000 funte. Ndërkohë, Liverpool si klub u gjobit me 50,000 funte për dështimin në kontrollimin e stafit të tij, ndërsa Everton pranoi të njëjtën akuzë dhe u gjobit me 65,000 funte.
Në një deklaratë të lëshuar të mërkurën në mëngjes, FA sqaroi:
"Një Komision Rregullator i pavarur ka vendosur sanksione ndaj Evertonit, Liverpoolit, Arne Slot dhe Sipke Hulshoff në lidhje me ndeshjen e Premierligës mes këtyre klubeve më 12 shkurt. U pretendua se të dy klubet nuk arritën të siguronin që lojtarët dhe/ose anëtarët e stafit në zonën teknike të silleshin në mënyrë të përshtatshme pas fishkëllimës së fundit. Everton dhe Liverpool i pranuan akuzat dhe Komisioni Rregullator vendosi gjoba prej 65,000 £ dhe 50,000 £ përkatësisht. U pretendua se trajneri i Liverpoolit veproi në mënyrë të pahijshme dhe/ose përdori fjalë dhe sjellje fyese ndaj gjyqtarit dhe asistentit të tij pas përfundimit të ndeshjes. Arne Slot e pranoi akuzën dhe Komisioni Rregullator vendosi një pezullim me dy ndeshje dhe një gjobë prej 70,000 £. Ndihmësi i tij, Sipke Hulshoff, gjithashtu u akuzua për sjellje të pahijshme dhe përdorim të fjalëve fyese ndaj zyrtarëve të ndeshjes, gjë që çoi në dënimin e tij. Për këtë arsye, Komisioni Rregullator vendosi një pezullim me dy ndeshje dhe një gjobë prej 7,000 £. Arsyet e plota të Komisionit Rregullator për këto vendime do të publikohen në një moment të përshtatshëm."
