De Bruyne nuk befasohet me Arsenalin e Artetës: Ata janë duke luajtur futboll shumë të mirë
Ylli i Manchester Cityt, Kevin De Bruyne, ka thënë se nuk është fare i befasuar me futbollin që Mikel Arteta po tregon me skuadrën e Arsenalit, duke thënë se po luajnë një futboll shumë të mirë.
Spanjolli mori postin e trajnerit të Arsenalit pas tre vitesh si pjesë e stafit stërvitor në Cityt. Topçinjtë kanë pasur një fillim të shkëlqyer këtë sezon, ku pas nëntë javëve qëndrojnë në krye të Premierligës.
I pyetur nëse është i befasuar kur sheh Arsenalin të lulëzojë nën urdhrat e Artetës, De Bruyne tha për Sky Sports: "Jo, jo në të vërtetë. Është e qartë se unë shoh shumë ngjashmëri me mënyrën se si ne luajmë, por ky ka qenë gjithmonë stili i tij. Kur ai pushoi së luajturi dhe ai pati mundësinë të vinte këtu, mendoj se ishte një shkollë e mirë mësimi dhe padyshim që kishim vite të shkëlqyera. Pashë një evolucion nga fillimi i Mikelit deri pas tre vjetësh kur ai u largua. Në fillim ai po përshtatej por më pas ai po futej gjithnjë e më shumë në rolin e tij. E pamë gjithashtu se ai kishte shumë ambicie dhe kur i vinte rasti e shfrytëzonte atë.
"Është bukur të shohësh se ai mori kohën e tij nga Arsenali. Jam i lumtur për të që po shkon mirë. Ata po luajnë vërtet, vërtet, futboll shumë të mirë. Shpresojmë që thjesht të mos jenë mjaft të mirë për ne."
Skuadra e Artetës ka një pikë më shumë se City i De Bruynes në nëntë ndeshje në këtë sezon. Pep Guardiola pranoi këtë muaj se skuadra e ish-asistentit të tij aktualisht po luan futboll më të mirë se kampionët në fuqi në Premierligë, duke thënë: "Ne nuk mund të harrojmë një gjë, zonja dhe zotërinj, ka një ekip që ka qenë më i mirë se ne. Ky është një realitet. Në realitet, Arsenali ka qenë më i mirë se ne deri më tani”.
Kjo është hera e katërt që Arsenali ka fituar tetë nga nëntë ndeshjet e para të një sezoni në ligë, pasi e kishte bërë këtë më parë në 2007-08, 2004-05 dhe 1947-48.
Skuadra e Londrës veriore do të shpresojë të ruajë vendin e tyre në krye të ligës duke mundur Leeds në Elland Road të dielën.
