Chelsea bën ofertën e parë për portierin e Brightonit

Chelsea ka bërë ofertën e parë zyrtare për të transferuar portierin e Brightonit Robert Sanchez.

“Blutë” janë duke kërkuar një portier të ri pas largimit të Edouard Mendyt në mënyrë që Kepa Arrizabalaga të ketë një kundërshtar dhe thuhet se Sanchez është i hapur për kalimin te londinezët.

Sanchez në fakt as nuk është i dashur më te Brightoni, meqenëse humbi vendin titullar nga Jason Steele në muajin mars.

Siç raporton “The Athletic”, Chelsea tashmë ka bërë ofertën e parë zyrtare mirëpo që Brighton ende nuk ka kthyer përgjigje, kësisoj diskutimet mes dy skuadrave janë duke vazhduar.

Spanjolli nuk është në planet e Brightonit ngase u la jashtë ekipit për fazën parapërgatitore, me klubin anglez që edhe nënshkroi me Bart Verbruggen.

Ai është pjesë e klubit që nga akademia, ku ka bërë 90 paraqitje dhe edicionin e kaluar iu ndihmoi të bëjnë historinë duke u kualifikuar në Ligën e Evropës.

Brighton po shpreson ta shesë për 30 milionë funte Sanchezin, por që shkaku i problemeve të ndodhura këtë kohën e fundit ekziston mundësia që kjo vlerë të bie.

Përndryshe, ai po stërvitet me skuadrën e U18 deri të gjejë një klub të ri.