Carlos Tevez: E ndoqa Francën, nuk e kam telefonuar Leo Messin për ta uruar për Kupën e Botës
Ish ylli i Manchester Unitedit, Carlos Tevez ka pranuar se nuk e ka pasur vëmendjen te Kupa e Botës "Katar 2022" dhe që as nuk e ka telefonuar Leo Messin për ta uruar.
Messi drejtoi Argjentinën drejt triumfit të madh në Kupën e Botës duke mposhtur në finale Francën pas 11-metërshave.
Sidoqoftë, Tevez për "Marca" e ka pranuar haptas se nuk e ka telefonuar Messin shkaku i mesazheve të shumta që mori ky i fundit, derisa theksoi se e ka shikuar shumë kombëtaren e Francës duke luajtur.
"Nuk e kam shikuar Kupën e Botës në Katar shumë, por e ndoqa Francën mjaftueshëm pasi ishte skuadra që më pëlqente".
"Nuk i kam shkruar Messit sepse telefoni i tij me gjasë ka shpërthyer (nga mesazhet e shumta). Më bënë shumë të lumtur që fëmijët e mi festuan golat e tij".
Tevez u rikthye te klubi i fëmijërisë Boca Juniors pas pensionimit, por argjentinasi deklaroi se është lodhur nga koha e tij në futboll, andaj nuk po i mungon asgjë.
"Nuk më mungon bota e Boca Juniors, as e futbollit, sepse më ka lodhur".
"Sapo u largova nga Rosario Central, mora një thirrje nga Independiente, por nuk kisha nevojë të shkoja dhe të menaxhoja asgjë".
"Të isha trajner ishte eksperiencë e bukur, e doja. Strategjia ishte pjesa që më pëlqeu më së shumti. Tani jam duke shijuar disa momente të jetës. Jam me familjen time".
38-vjeçari mbahet mend si një ndër sulmuesit më të mirë gjatë kohës te Manchester United dhe Manchester City, derisa luajti më vonë edhe për Juventusin dhe Shanghai Shenhua.
Ai u bë trajner i skuadrës argjentinase Rosario Central pas pensionimit, mirëpo u largua pas vetëm pesë muajve në krye.
