Brazili barazon me Kolumbinë, mësohen të gjithë çerekfinalistët e Kupës së Amerikës
Me dy ndeshjet e grupit D është mbyllur faza grupore e Kupës së Amerikës, ku Brazilia e Kolumbia barazuan për të kaluar të dyja në çerekfinale të turneut, kështu për t'u mësuar të gjitha tetë skuadrat që do të luftojnë në fazën e eliminimit direkt.
Mëngjesin e hershëm të ditës së sotme (e mërkurë), u takuan Kolumbia - Brazili e Kosta Rika - Paraguai.
'Selecao' ndonëse ishin duke fituar me një epërsi të hershme, nuk arritën të merrnin tre pikët e plota, për të kaluar në vendin e parë.
Ishte Raphinha që realizoi gol shumë të bukur nga gjuajtja e lirë në minutën e 12-të, për rezultatin 1:0.
Raphinha 🎯 pic.twitter.com/1txkQJc6ay
— CONMEBOL Copa América™️ ENG (@copaamerica_ENG) July 3, 2024
Por Kolumbia insistoi në vazhdim, duke krijuar më shumë raste shënimi dhe kështu arritën te goli i barazimit.
Në një dalje të shpejtë, Cordoba asistoi bukur për Munoz, me këtë të fundit që e çoi topin prapa krahëve të Alisson Becker, për të barazuar rezultatin në 1:1, në minutat shtesë të pjesës së parë.
Daniel Muñoz y el empate cafetero 🇨🇴 pic.twitter.com/4XvptsZ6fs
— CONMEBOL Copa América™️ (@CopaAmerica) July 3, 2024
Deri në fundin e ndeshjes më gola nuk pati në takim, me Brazilin që kishte posedimin e topit, ndërsa Kolumbia ishte për një nuancë më e rrezikshme.
Ky barazim, ia mundësoi Kolumbisë vendin e parë në grup, e Brazilit të dytin, për të kaluar të dyja në çerekfinale.
Në ndeshjen tjetër, Kosta Rika fitoi ndaj Paraguait me rezultat 2:1, por që tre pikët ishin të pamjaftueshme për të ecur tutje.
Calvo në minutën e 3-të dhe Alcocer në minutën e 7-të shënuan për dy golat e shpejtë të kostarikanëve, teksa Paraguai me anë të Ramon Sosa në minutën e 55-të, shënuan për rezultatin përfundimtar 2:1.
Të dy këto skuadra eliminohen në fazën grupore.
Çiftet çerekfinale
Janë mësuar të gjitha katër duelet çerekfinale të Kupës së Amerikës.
Ashtu siç dihej, Argjentina do të takohet me Ekuadorin më 5 korrik me fillim nga 03:00 me orë lokale të Kosovës, duke vazhduar me takimin Venezuela - Kanada, që zhvillohet një ditë më pas në orar të njëjtë.
Në anën tjetër, më 7 korrik, zhvillohen dy takime. Fillimisht në 00:00 përballen Kolumbia - Panama, teksa në 03:00 do të jetë derbi mes Uruguait e Brazilit.
